كنباوى وكنباوية .. حلقه رقم (57) .. ( تمرد ) القشة التى قسمت ظهر الإخوان

كنباوية تجالس ابنها كنبة وتتبادل معه أطراف الحديث وهي تقوم بعمل وتحضير الغداء للأسرة جميعا. 
كنبة: حتغدينا إيه يا أمة النهارده؟
كنباوية: هو ده اللي إنت فالح فيه، همك بس علي بطنك، قولي ياواد عملت إيه في الشغل لقيت شغل ولا لسه قاعد عواطلي علي القهوة ؟
كنبة : لقيت يا أمه ، اشتغلت علي توك توك
كنباوية : هي دي شغلانة ياموكوس؟ قسمتي وأخرة صبري ابني الحيلة يشتغل سواق علي توك توك ؟
كنبة: أعمل إيه يا أمه؟ هو أنا لقيت غيرها وقلت لأ، دي ظروف البلد منيلة بستين نيلة، وبعدين ماكنش قدامي حل إلا إني أشتغل الشغلانة دي، أو أشتغل مندوب مبيعات ألف بشنطة علي القهاوي طول النهار أعرض اللي معايا علي زباين الكافيهات، أو أشتغل موظف أمن وأفضل واقف علي أي مكان حارس 8 ساعات ، قلت شغلانة سواق التوك توك أرحم لحد ما ربنا يفرجها من عنده ويعدلها بشغلانة تانية كويسة. 
كنباوية: لأ غلبتني ياواد ، مصدقاك وكنت ظلماك عموما بكره تتعدل
كنبة: فكرك فعلا بكره ده جاي ؟
كنباوية: أيوه ياواد بكره ده جاي ماتكفرش رحمة ربنا واسعة وربك فرجه قريب خلي عندك أمل في بكره وفي ربنا. 
كنبة: ونعم بالله
كنباوية : مضيت علي استمارة تمرد
كنبة : أيوه مضيت ، بس تفتكري إنهم حيقدروا يشيلوا مرسي؟
كنباوية : ويشيلوا المرشد كمان ، دول ناويين يجمعوا 15 مليون توقيع وربنا معاهم
كنبة: ياريت يا أمه ، ياريت
كنباوية : حيقدروا ياواد ، حيقدروا بس أنا واخدة علي خاطري منهم علشان صرحوا وقالوا إنهم رافضين إمضاء شفيق ؟
كنبة: فيها إيه يا أمه ؟ همه حرين
كنباوية: لأ مش حرين ، شفيق مننا برضه ومتنساش إن له أنصاره ومؤيديه وحتي لو كان غلط المسامح كريم المهم إنه عرف غلطه وهو أحسن من غيره وبعدين مش مفروض إن تمرد تعادي حد وخاصة إن امضاءات أنصار شفيق حتفرق معاهم كتير لأن أنصار شفيق بالملايين. 
كنبة: الله يفتح عليكي يا أمه نورتيني
كنباوية: ده تمرد عامله رعب للإخوان من كتر التوقيعات اللي بيلموها والمرشد نفسيته تعبت والشاطر بطنه بتوجعه ومرسي مش بينام من القلق والخوف من الحملة دي اللي بتهدد أمنه. 
كنبة: والعريان عمل إيه لما سمع عن الحملة دي ؟
كنباويه : عمله اسود البعيد ، هو حيعمل إيه يعني؟ ولا حاجه غير شوية عنطزة وكلام فاضي مالهوش معني لا حيودي ولا حيجيب. 
كنبة: وباقي الجماعة؟.
كنباوية: عمالين يهبهبوا ولا حد سامع لهم دول خلاص اتفضحوا وبانوا علي حقيقتهم ، بس ياواد كفاية كلام معاية، قوم شوف إنت رايح فين وسبني أكمل الأكل المحشي بياخد غلبه وأنا مش ناقصة دوشة ووجع دماغ وعطلة 
كنبة : انتي حتغدينا النهارده محشي؟
كنباوية : أيوة ، عندك اعتراض ؟
كنبة: اعتراض ! هو فيه حد يعترض علي إنه ياكل محشي ؟ ياريت تأكلينا محشي كل يوم. 
كنباوية: كل يوم ! هو أنا لاقية صحتي لما أعمل محشي كل يوم ده دوخة وأختك مش بتساعدني علي طول نايمة يا إما واقفة بتتزوق أدام المراية، كفاية عليكم تاكلوه مرة واحدة في الأسبوع واحمدوا ربنا. 
كنبة: حاضر يا أمه وتسلم إيديكي مقدما، أنا حنزل أشتغل علي التوك توك شوية وأرجع علي الغدا أتغدى وأبقي انزل تاني
كنباوية : ماشي يا كنبة ربنا معاك يا ابني وأنا حخلص الأكل بسرعة قبل ما أبوك يجي من شغله جعان هو كمان. 
كنبة : عن إذنك يا أمه
كنباوية: إذنك معاك يا كنبة، وربنا معاك إنت واللي زيك يا ضنايا.