أطرف مواقف رواد فيس بوك مع الكلاب (صور)
يعاني البعض من الخوف من الكلاب خاصة الضالة منها تجنبا لتعرضهم للعض، ويؤدي ذلك الخوف لعدد من المواقف الطريفة التي روى بعضها مستخدمو مواقع التواصل الاجتماعي فيس بوك.
- زواج سببه 5 كلاب
قال محمد: "طب أنا عندى فوبيا من الكلاب وحصل معايا موقف عمرى ما هنساه اقسم بالله.. أنا كنت راجع من القهوة الساعة 11 بالليل وأنا في مكان مفيهوش حد أصلا وأنا راجع لقيت بنت طالعة تجرى من الشارع اللى قبلنا ولقيتها بتقولي إلحقني يا كابتن أنا قولت بس يبقا في حد عاوز يخطفها أو يغتصبها لأننا في مكان شبه مهجور أنا وقفت وعلى طول معايا مطواة في جيبي وقولت دي بنت وهدافع عنها لو هموت فاوقفت وجاتلي تنهج اوي وبقولها اهدى في ايه لسه بتقولي في كل.. لقيت 5 كلاب طالعين من الشارع بيجرو وراها".
كلب بيطير
وقال كارم: "أنا معايا عجلة رود كنت رايح سفاجا من قنا وماشي على الصحراوي ومرة واحدة لقيت كلب مش بيجري ده بيطير، وأنا أسرع وهو يسرع وحلفت وقتها مطلع تاني على الصحراوي".
خوف مشترك
وأضاف أحمد: "حصلت معايا كانت جارتي ولقيتاه جاية بتجري والكلب وراها فواقفت جنبي قولتلها كملي جري أنا كمان بخاف من الكلاب".
جريت بالشنط بتاعت السفر
وقالت إيمان: "أنا عندي فوبيا كلاب باردو، أنا كنت عند محطة القطار ورايحة سكن الكلية وشايله شنط بقا ونزلت خلاص ولقيت كلب واقف روحت راميه الشنط كلها وجريت معرفش أنا عملت كدا ازاي الشارع لللى بخده في نص ساعة خدته في دقيقتين وببص كان في قهوة لقيت كل الناس للى قاعدة في القهوة كلها بتجري ورايا وكل واحد شايللي شنطة ويقولولي استني متخفيش خلاص مشي وأنا أقولهم لا انتوا عايزين تموتوني ولا إيه.. كان يوم أزرق".
الكلب سرق شبشبي
وأضاف محمد: "أنا بقي كنت بصلي وسايب الشبشب بره وإحنا خارجين لقيت الإمام بيقولي الكلب خد شبشب وجري قولتله ده بتاعي قالي أجري وراه متسيبوش".
وقالت أوليفيا: "حصلت معايا قبل كدة بس المشكلة أني أنا اللي كنت رايحالها برجلي ودة اللي قاهرني.. المهم حصل من كام شهر إن في كلبة ولدت عندنا في الشارع اسكت؟؟ لا ازاي تروح وخداني الحنية واقول دي صحبت عيال ومش عارفة اية لما أنزل ااكلها واشربها المهم نزلت وعينك م تشوف إلا النور كانت عماله تزن عليا واللي هو هتقوم تهربدني قلت ماخدش عليها يمكن خايفة على عيالها رغم أن ركبي والله كانت بتخبط على الجيران.. لمهم راحت قامت من مكانها وحاوطتني وقعدت تهوهو عليا وحياة ربنا أنا قولت دي نهايتي انهاردة.. خفت أجري تطلع تجري ورايا تجيبني من شعري روحت قولتلها خلاص هطلع اجري صدقيني واهوشلها بأيدي على اني اصعب عليها مفيييش".
وأضافت: "في الآخر راحت لفت ورجعت تقريبا صعبت عليها وكان يوم أسود ما يعلم بيه إلا ربنا وكنت ماشية هقع وآخر طين بصراحة.. كنت عاوزة أقولها انا عندي كلبة لو شافتك وانتي بتعمليلي كدة مش هيجرالك".
