رئيس التحرير
عصام كامل
Advertisements
Advertisements
Advertisements

إسماعيل ياسين في المدارس اليابانية: «وشك قدام.. وقفاك ليا»

فيتو

"سوماكو هاكو سوماكو هاكو.. هتيجوا قدامى هروح وراكو".. يااااااحلاوتى.. إيه دا بقا.. لا والنبى ماحدش يآخذنى.. دا أنا بس كنت بتكلم شوية يابانى أفتتح بيه المقال بتاعي والنبى.. أصل أنا النهاردة هتكلم عن المدارس اليابانية.. "وشك قُدام وقفاك ليا".


حاكم السنة اللى فاتت قالولنا إنهم هيفتحوا 100 مدرسة يابانية.. وهاتك يا كلام وهاتك يا تصريحات لما حسسونا إن العيال في مصر هتتكلم يابانى من 6 الصبح.

بعدها عرفنا إنهم هيفتتحوا 80 "مدرسة" فقط.. وأنا يا خويا معرفش حصل إيه لقينا الوزارة بتقول هنفتتح 40 مدرسة بس.. وهاتك يا تهليل للأربعين مدرسة.. قوم إيه يطلع الوزير يقول هنفتتح 28 مدرسة فقط.. "مرة فقط ومرة بس.. ومرة بس ومرة فقط".. ثم فوجئنا بقرار للوزير بتأجيل تجربة المدارس اليابانية للعام الدراسي المقبل.

أنا والشعب والسامعين كنا مستنيين المدارس اليابانية ونفتكرها هتكون مجانية.. أو حتى بأجور رمزية.. أتاري الحكاية طلعت مش هي.. يعنى زيها زى مدارس اللغات.. والتعلب فات وفى ديله سبع لفات.. أيوة ياخويا سبع لفات.. ما هي مصروفاتها مش هتقل عن سبع ألوفات.. سبعة آلاف جنيه يا سعادة البيه.. يعنى الفقير مالوش مكان فيها.. دا حتى شروط القبول فيها هي نفس شروط القبول بالمدارس الخاصة.. مع إنها منحة من اليابان للفقراء.. لكن إزاى بقى المدارس النضيفة دى يدخلها تلاميذ من عامة الشعب.. كلا وألف كلا.
وآديهم بيقولوا إنهم هيفتتحوا 8٠ مدرسة.. سنرى.. يارب ما ترسيش على 8 مدارس.

ورغم أن المدارس دى عايزة تنشر بين تلاميذ الدول النامية شوية عادات يابانية كدا اسمها "التوكاستو"، وهي نوع من الأنشطة التربوية تقوم على تنمية الشعور بروح الجماعة، والمسئولية وروح التعاون.. إلا أننا إحنا الكبار خالفنا كل تلك القواعد وخلينا المدارس المجانية بفلوس كتير علشان نحرم منها المجتمع الفقير.. ماهو إزاى بقى الفصول الواسعة والمقاعد الشيك ممكن يستعملها أبناء الفقراء؟! طبعًا لا يصح.
طب والنبى مانا قايل أكتر من كدا.. وعايز أروّح.. سيبونى أروّح.. والسلامو عليكووووووووووووووو
Advertisements
الجريدة الرسمية