أبو العريف يكتب: «سلملي على الشفافية»
من كام يوم كده قرأنا خبرا في كام صحيفة كده عن ضبط كمية من اللحوم الفاسدة، وصلت لـ357 كيلو غير صالحة للاستخدام الآدمى.. اللحوم دى بقى كانت رايحة لسلسلة مطاعم شهيرة بالقاهرة، لكن الصدفة جعلتها تقع في أيدى الأجهزة الرقابية بوزارة التموين والتجارة الداخلية.. وما أجمل الصدفة حين تجمع الشتيتن.
عموما اللحمة نفسها مش موضوعنا.. علشان إحنا ملناش فيها.. إحنا موضوعنا هو الجهات الرقابية بوزارة التموين وسلسة المطاعم الشهيرة.. والصحف اللى نشرت الخبر.
وسؤالنا بقى.. هي السلسلة دى اسمها إيه؟!.. وليه الرقابة التموينية لم تبلغ الصحف باسم سلسلة المطاعم؟!.. ولو كانت أبلغتها وفيه محضر فعلا بالواقعة.. ليه الصحف ما نشرتش اسم السلسة؟!
وإيه يعنى معنى إنك تضبط لحمة فاسدة وتنشر الخبر دون أن تخبرنا باسم المطعم اللى بيقدمها لنا؟!
طب حتى كمل جميلك وأثبت لنا أنك بتعمل كده لمصلحتنا وأنصحنا منروحش المكان دا تانى.. ولا سيادتك يعنى بتدى فرصة تانية للمطعم إنه يسمم أهالينا؟!
طب أنا بصفتى “أبو العريف” عرفت اسم سلسلة المطاعم.. وعرفت أن عملية الضبط تمت بالصدفة عن طريق طبيب بيطرى.. لكننى وبكل صراحة مش لاقى مبرر لعدم ذكر اسم المطعم اللى بيقدم لحوم فاسدة للناس، غير أن وزارة التموين وهيئة الطب البيطرى والصحف اللى نشرت الخبر بيحبوا الفوازير وعايزين الشعب يتسلى ويبحث عن المطعم بنفسه.. وإذا عرفت الحل أرسل لنا الإجابة على ديوان عام وزارة التموين والتجارة الداخلية.. وسلم لى على الشفافية.
