بهلول المشغول: دماغى بقت خرمانة

يخرب بيتك يا سيجارة
ويخرب بيت معرفتك
مش لاقي أي أمارة
ع السعر بتاع سعادتك

أدينى قاعد خرمان
ومتشحطط من غيرك
دا حتى البرلمان
مش عايزنى أجيبك

يخرب بيتك ياسيجاره
بوظتى لينا المنظومة
شكلنا بقى سخيف
وشمتي فينا الحكومة

سعرك بقى مخيف
وغليتي خلاص علينا
حتى كوكو الضعيف
تّمّنها مش أد ادينا

يخرب بيتك ياسيجارة
عيشتيني في مذلة
دماغى بقت خرمانة
ومش بكتب في المجلة

في بعدك مش عارف أعيش
ولا عارف يوم أتهنى
اشترى رغيف العيش
ولا أتكيف واستنى

يخرب بيتك ياسيجارة
ويخرب بيت أيامك
ياريتنى سمعت كلام الناس
وماسمعتش كلامك

كل اللى غلوكي علينا
دول برضو بيشربوكي
غاويين يعكننوا فينا
وبالغالى بيشتروكي