رئيس التحرير
عصام كامل
Advertisements
Advertisements
Advertisements

البااارلمنجى: أنت فين يا نائبنا ياللى مفرط في مصلحتنا؟!

فيتو

طبعا كلكم لاحظتم إن السيد معالى نائب دايرتنا بيهجرنا كل يوم خميس.. وسايبنا كدا للحكومة تصب في مصلحتنا براحتها وكأننا مش ورانا نواب تأكل الزلط.

وأنا معرفش ليه الحكومة مصممة على أنها تفاجئنا كل يوم خميس بزيادة سعر أي حاجة.. أو نشر قرار يعكنن على اللى جابونا وكأنها أصبحت عادة أسبوعية لا يمكن الاستغناء عنها لدرجة أنها طفشت مننا النائب اللى حيلتنا.

وأنا جمعتكم النهاردة يا أهالي دائرتنا الكرام علشان ألفت نظركم إلى أن نائبنا مقضيها تهييس وبيهجرنا كل يوم خميس.. ليه بقى؟!
علشان كلنا بنتلم حواليه ليلة كل خميس وإشى اللحمة زودوها والفاكهة بقت للأثرياء فقط والبيضة بجنيه ونص وكروت الشحن بقت بتدينا رصيد بنصف ثمنها.. وهكذا كل يوم خميس نلتف حواليه وهاتك يا آهات من اللى بيحصلنا من الحكومة.

المصيبة أن الحكومة مصممة على أن كل اللى بتعمله فينا دا بيصب في مصلحتنا.. طب دى الحكومة ومش عارفين نكلمها.. أما سيادة نائب دايرتنا دا اللى بيهرب مننا كل يوم خميس فهو اللى مزود خيبتنا وسايبنا للحكومة تنهش في مصلحتنا دون رادع.
وأنا من هنا بقول لسيادة النائب: على فكرة إحنا اللى انتخبناك وعملناك نائب علشان تشوف مصلحتنا.. يعنى مصلحتنا هي مصلحتك ومصلحتك هي مصلحتنا والحكومة بتلعب في الاتنين دون رادع.. وأنت ساكت ومستكنيص وموالى مع الحكومة ومش حاسس باللى بيجرى في مصلحتك!

لكن إحنا حاسين وتعبانين وبنصوت بعلو الصوت.. إنت فين يا نائبنا ياللى مفرط في مصلحتنا.. يا راجل قول لأ حتى ولو مرة قبل انتهاء الدورة الانتخابية.
عموما هو دا قدرنا وهى دى نتيجة اختياراتكم لنوابكم.. في الوقت اللى كنت أنا وراكم وقدامكم.. وأقول قولى هذا وربنا يكون في عون مصلحتكم ومصلحة سيادة النائب بتاعكم.

مع تحياتى: أخوكم «نزيه صندوق عبد المتعال النائب» الشهير بالبااارلمنجى.. نائب ساقط ببرلمان 2016.
Advertisements
الجريدة الرسمية