بالصور.. فضائح رواد «فيس بوك» في بداية استخدامهم للموقع.. أسماء: «شتمت واحدة في بوست بدل رسالة لأختى».. هاشم: خاصمت صاحبي عشان صديقة مغربية.. شروق: اختى عملتلى بلوك.. ونورا: ضحكوا

بدأ عالم "فيس بوك" غريبا عن الكثيرين كعادة أي جديد مما أوقع عدد كبير من مستخدميه في أخطاء جعلتهم محل سخرية، وروى هؤلاء الأشخاص أغرب ما فعلوه في بداية استخدامهم للموقع عبر صفحة "الكومنت الفصيل" عبر "فيس بوك"، وحازت تعليقاتهم على إعجاب الكثيرين.

- البنت المغربية وصاحبي الخاين
روى هاشم الجزار حكايته قائلًا: "كان في بت مغربية عندي على الأصدقاء وكنت بكلمها كل يوم المهم لقيتها صديقة عند واحد صاحبي خاصمته 5 شهور ولو حد سألني مخاصمه ليه اقوله ده خاين مدخلوش بيتك".
وكتب محمد نجيب: "ياه أيام العيد الكبير كنا بننزل صور للخروف شون هو والقطيع بتاعه وكل واحد نعمله تاج على وش خروف وفى العيد الصغير نعملها على أرانب وبيض".

- المزرعة السعيدة
قال مينا سامى: "كان ف اتنين وإحنا صغيرين لما بنروح السيبر كانوا بيقعدوا عالأجهزة جمب بعض ويقعدو يكلموا بعض بجد ويبعتوا رسايل لبعض وده يقولوا ازيك ويردو ع بعض، ولما كنت اتريق عليهم كانوا يضحكوا ويقولو عليا جاهل ويقولولي هو الفيس معمول عشان نكلم بعض عليه أنت بس اللي مش فاهم والمشكلة إنهم إخوات".
علق عبد الله ربيع قائلا: "كنت بلعب المزرعة السعيدة طبعا، كنا بنكلم الفرند نقولهم ابعتوا حاجات وكده ببص بقا في الرسايل القديمة لقيت واحد بقوله ابعت صامولة واللي بقوله ابعت مواسير واللي بقولو ابعت خرطوم".

- الشتيمة في "البوست" بدل الرسائل

ذكرت أسماء رفعت: "كنت أما أعوز أبعت مسدج لحد اسيبهاله في بوست ومرة فضلت أشتم واحدة والله على أساس إنها رسالة رايحة لأختي ومحدش هيشوفها وكنت بمضي تحت البوست باسم اللي أنا بعتالها".

- بلوك أختى
وكتبت شروق: "أول ماعملت أكونت لأول مرة كانت أختى في الشغل وعندها نت برضه وكانت ايامها تعبانة ورجلها وارمة كتبتلها على صفحتها ماما بتقولك رجلك عاملة إيه دلوقت لسه وارمة ولا خفت تقريبا عملتلى بلوك".
وتابعت نورا فوزى: "أنا أول ما عملت الأكونت مكنتش عارفة أي حاجة في الفيس، فكنت عاوزة ألعاب على الفيس فروحت كتبت ف المكان اللى المفروض أنشر فيه البوستات وكدة فكتبت ألعاب تلبيس بنات وأنشر، ومظهرليش حاجة فكتبت ألعاب سيارات فبرضه مظهرش ألعاب وعمالة أنشر وأنشر وأصحابى اللى عندى يضحكوا ف الكومنتات".