مصريون يطالبون بابا الفاتيكان بمد زيارته لمصر بهاشتاج «يومين مش كفاية».. إيمان: تقعد تقضى رمضان معانا.. عاطف: تعالي نعزمك على طواجن في شبرا.. محمد: خليك منورنا
طلب نشطاء مصر بمواقع التواصل الاجتماعي "فيس بوك وتويتر" من بابا الفاتيكان البابا فرنسيس، أن يستمر في زيارته وألا يغادر مصر اليوم، وذلك من خلال هاشتاج "يومين مش كفاية يا قداسة البابا"، الذي احتل مركزًا متقدمًا على موقع "تويتر"، ليؤكد النشطاء أن مصر تنعم بالسلام وأن زيارة بابا الفاتيكان لو استمرت، فإنه سيشهد حالة التآلف والمحبة بين المصريين أقباط ومسلمين.
خليهم أسبوعين
قال الفرس المصري: "يومين مش كفاية يا قداسة البابا.. خليهم أسبوعين شهرين سنتين قرنين".
وأضافت أم عمر: "يومين مش كفاية ياقداسة البابا.. شكرا قداسة البابا شعب مصر ممنون لزيارتك القصيرة كنا نتمني أن تطول لزيارة معالمنا السياحية القبطية والإسلامية".
وعلق عاطف دسوقي: "يومين مش كفاية ياقداسة البابا.. تعالي نعزمك على طواجن في شبرا عند فتحي شكل، وتشوف صورة العدرا جنب سورة ياسين.. لو حضرتك شرفتنا في شبرا مصر وشوفت العلاقة بين أهلها مسلمين ومسيحين مش هاترجع الفاتيكان وهتقول دي أرض السلام".
وردت زيزي صالح: "يومين مش كفاية ياقداسة البابا.. أسعدت المسلمين قبل المسيحيين رسالة للعالم أن "مصر تعايش الأديان" "الدين لله والوطن للجميع".
وتابعت فاطيما بوسي: "الحبر الأعظم البابا فرانسيس رئيس دولة الفاتيكان جئت حاجا إلى مصر جملة هزتني بجد أهلًا وسهلًا بيك مصر نورت والله".
بكرة أجمل
وقالت أم السفيرة هبة: "يومين مش كفاية ياقداسة البابا.. أكيد ربنا ذكر مصر في كل الكتب السماوية مصر بكرة هتكون أجمل من الأول".
وأضاف عربي الشامي: "ما تقعد عندنا وسيبك من هناك داحنا شعب بيحي السلام.. يومين مش كفاية ياقداسة البابا".
وعلقت إيمان رمضان: "يومين مش كفاية ياقداسة البابا.. عارف قداستك لو جربت الفطير المشلتت عندنا مش بعيد تقعد تقضى رمضان معانا... والله نزيد بركة".
ورد عنتيل النشطاء:"بابا الفاتيكان بدأ قداسه بالسلام عليكم.. وقال مصر أم الدنيا وكمان قال تحيا مصر ده لو قعد كمان يومين هيغني تسلم الأيادي وربنا.. يومين مش كفاية يا قداسة البابا".
وتابعت إسراء مصر: "أنا مسلمة وفرحانة جدا بزيارة البابا وبجد نفسي تتكرر كل سنة بجد إنسان يتحب لأنه كان جاي مصر رسول للسلام.. يومين مش كفاية ياقداسة البابا".
منورنا
وقال محمد عفيفي: "يومين مش كفاية ياقداسة البابا.. خليك منورنا قداستك... ده مجرد وجودك بركة لينا ولمصر".
وأضاف ميدو إيجيبت: "يومين مش كفاية ياقداسة البابا.. المرة الجاية تعمل حسابك في أسبوع ماينفعش تقول "تهيا مصر" وتمشى بعد يومين".
وعلق محمود الهواري: "يومين مش كفاية ياقداسة البابا.. الأرض الطيبة والشعب الطيب يرحب بأهل السلام نحترم كل أقباط العالم، لأجل أخوتنا أقباط مصر الطيبين".
وردت مشيرة خيري: "يومين مش كفاية ياقداسة البابا.. أسعدت أشقاءنا في الدم والوطن بوجودك بيننا، أدخلت في قلوبهم البهجة بمباركتك أرضنا عامرة مصر بوجودك معنا.."
