باسم يوسف مهاجما الإخوان: «بتتهموا الناس بالشذوذ»
شن الإعلامي الساخر باسم يوسف، مقدم برنامج «البرنامج» سابقا، اليوم الخميس، هجوما حادا ومفاجئا على جماعة الإخوان الإرهابية.
وقال «يوسف»، عبر صفحته الشخصية بموقع «فيس بوك»، اليوم: «والله والله والله أنا بحاول أتجنب أجيب سيرتهم.. بيفضلوا يستفزوا في الناس ويزايدوا على اللي جابونا وبنحاول نسكت عشان لما بنرد واحد لطيف يطلع يقول: هو ده وقته؟ يا عم الضرب في الميت حرام، المفروض نصطف وما نعضش في بعض إلخ إلخ.. المشكلة إن حتى الواحد وهو بيتكلم عن النظام الحالي وبيتجاهلهم خالص ومش بيجيب سيرتهم، بيطلعوله برضه عشان يلوموا الواحد على اللي بيحصل ويقولك أنتم السبب وأنتم المسئولين إلخ إلخ.. فعلشان كده يظهر أن الواحد لازم يفوقهم كل شوية ويفكرهم بتاريخهم الوسخ مش عشان يعرفوا غلطتهم، لا، البوست ده مش ليهم، لأنهم مكابرين ومدعين ومنكرين للمصايب اللي عملوها.. لا ده للناس اللي بيتأثروا بكلامهم وبمظلوميتهم وبيصدقوا إن اللي حصل ده غلطة ناس تانية غيرهم وعشان يشوفوا وساختهم ويحطوها قدامهم».
وأضاف: «لو إنت يا عزيزي منهم ولكنك محترم نفسك وكافي خيرك شرك وعارف إن الكل أخطأ يبقى تعالى على جنب شوية، باعتذرلك لو البوست ده طرطش عليك، مش إنت المقصود».
وتابع: نبتدي بالسطر المفضل: "إنت كنت السبب في القضاء على التجربة الديمقراطية بسخريتك من مرسي"، لا يا حبيبي، إنت فاهم الديمقراطية غلط.. الديمقراطية مش منة ولا فضل من مرسي بتاعكم.. الديمقراطية هي اللي ليها الفضل إنه جه رئيس.. والديمقراطية دي هي اللي خلتكم تعيطوا بعد الجولة الأولى لما مرسي اللي كنتم فاكرينه حيكتسح اضطر يخش جولة تانية قدام شفيق.. وفضلتم تلفوا على "رفقاء الميدان" واحد واحد وتعيطولهم وتكلموهم وتترجوهم و"النبي تعالوا مؤتمر الفيرمونت" (بعد الانتخابات) بعد لما كنتم بتهاجموهم في برامجكم وتشنعوا عليهم.. وبسببهم مرسي كسب بواحد في المية بسبب "عاصري الليمون" اللي زقوه.. أنا كنت من الناس اللي إنتم اتصلتم بيهم واترجتوني أساند مرسي، وأنا قلت الاتنين أوسخ من بعض مش حعلن تأييدي لحد».
وأردف: «بسبب الديمقراطية يا حبيبي مرسي المفروض كان يتبهدل وينتقد بأدب وبقلة أدب.. الديمقراطية مش بتخلص عند الصناديق.. الديمقراطية بتكمل لبعد كده.. آه والديمقراطية فيها شتيمة وسخرية وتأليس عادي.. كان المفروض نعمل إيه يعني؟ نسكت؟ نطبل؟ نسكت على هبل مرسي والناس اللي مختارهم وتناقضاتهم؟ نسكت على الزبالة اللي كنا بنشوفها في قنواتكم؟ وكمان هو احنا كنا بننتكلم لوحدنا؟ انتم كان عندكم بدل القناة مواقع وصفحات وجريدة وقنوات سلفية في صفكم "الناس، الحافظ، الخليجية وغيرهم".. كنتم بتطلعوا في القنوات دي وتنتهكوا حرمات الناس: تتهموا ده بالشذوذ، ده بالكفر وده بالعمالة.. وكل ده على فكرة في ظل الديموقراطية اللي كنا كلنا عايشين فيها مش بمنة ولا فضل من مرسي بتاعكم».
واستكمل: «اللي حصل بعد كده أن انتم اللي انتهكتوا الديمقراطية دي.. لما مرسي قعد مع رؤساء الأحزاب واتصور معاهم وبعدين طلع إعلان دستوري لوحده وبعت ميليشياته للمحكمة الدستورية العليا وحاصرها ووقفت الميليشيات هناك تهتف للداخلية اللي وقفت وما عملتش حاجة.. فاكرين؟ فاكرين ولا نفكركم؟».
واستطرد قائلا: «موضوع بقى إن البرنامج ما حدش قربله وقت مرسي: يا راجل؟ طب هو أنا رحت النائب العام أتفسح؟ ست ساعات استجواب وكفالة وعلي قنديل "اللي استضفته في الحلقة" نفس الموضوع.. طب إيه رأيكم بقى إن قبل تلاتين ستة وزير الاستثمار الإخواني بتاعكم بعت تحذير مكتوب لكل القنوات إن أي برنامج هيسخر من الرئيس حيتقفل والقناة حتتقفل بعد الإنذار التاني، الإنذار ده اتبعت واحنا بنصور آخر حلقة قبل تلاتين ستة.. يعني نيتكم كانت وسخة أصلا».
