«ريحة حيطان».. قصيدة لمينا إميل يوسف

ريحة حيطان
شقة المصيف زمان
صوت أمواج البحر
مش نسياه الودان

منظر صناع الشماسى
و لا أشكال الكراسى
في شوارع إسكندرية
أنت فاكر ولا ناسى

ناسى الحلاوة الشعر
ولا القاعدة ع البحر
كنا نرحرح شهر
في جو ريحته سحر

فاكر ريحة اليود
ولا الغنى ع العود
بالليل تسقع فجأة
نتكتك من البرود

كنا عايشين الحياة
بدون لا مال ولا جاه
بس نضحك مهما يحصل
دلوقتي في مية اه