الأيام

الكلمة دي مهمة جدًا، وأحيانًا كتير بتمر علينا مرور الكرام، وأوقات كتير مش بناخد بالنا منها.. مش بناخد بالنا إن ممكن تكون الكلمة دي هي السبب في كل حاجة بتحصلنا، هي المسئول الرئيسي عن كل الأحداث اللي بتحصلنا في حياتنا، سواء كانت حاجة حلوة أو حتى حاجة وحشة.

الكلمة دي تشمل معاني كتير جدًا، الأيام يعني الظروف، يعني الضغوط، يعني الفرحة والذكريات، كل حاجة حصلت وهتحصل أو حتى لسة بتحصل، كل تفصيلة مرت قدام عنينا قبل ماتجيلنا مرت على الأيام، كل دمعة قبل ما ندمعها عيطت مع الأيام، كل قرار خدناه، كان سببه الأيام، كل حاجة وحشتنا ونفسنا ترجع تاني بنفتكرها بالأيام، كل جرح طول وعلم فينا، كان معلم على الأيام، كل كلمة حلوة كان سبقها فرحة ليوم من الأيام، كل حد سابك ومشي كان معاك في يوم من الأيام، كل نظرة حلوة كانت منها كانت في يوم من أحلى الأيام.

الأيام اللي مهما يفوت عليها العمر ويعدي، ييجي قلبك عندها ولازم يهدى، حالة الشوق اللي كانت عندك واتحولت لحاجة تانية بسبب الخوف من اللي جي والخوف من الأيام. اللي سابك واللي باعك وحتى اللي خانك كنت جمبه في يوم، ورفض يكمل معاك بقية الأيام.

أيام زمان وأيام دلوقتي وأيام قولنا عليها امتى تخلص وتيجي بعدها أحلى الأيام؟

الأيام اللي مرت علينا ومن تقل دمها، خدناها على قد عقلها من باب المبدأ اللي بيقول مسيرها تعدي وتفوت وتخلص الأيام..

على قد ما الأيام دي شيء مهم، بس لسة فيه الأهم وهو يا ترى لما تمشي هيفتكروك بأنهي أيام...؟