"صلوات الروح" قصيدة لمحمد حميدة

وفي عز ما كان الحلم ضباب
انا كنت بشوفك طاقة نور
بتطل ف وقت الكون ما يضيق
وبتغسل روحنا من الأوجاع
فبيصبح ضيق السكة براح
وبشوف الأرض بتعطش شوق
وبتطرح ورد
وبشوف الحلم برغم الكد
ورغم النوح
لساه بيعافر ويا الأرض
علشان ما يكون الطرح عيدان
من قلب الطين
وف عز ما كان احلام الكل
أشكال وألوان
كان حلمي يا دوب
ألقى الإنسان في عيون الناس
الليل أجراس
وأنا وحدي بدق ساعات الكون
والحلم الطيب ما يبقاش
غير في السموات
صلوات الليل بتبوح بالسر
وبتفرش نور الله ع الأرض
فيكون عكاز لقلوب الخلق
ويكون تفاريح لبنات الأرض
ياعيال الطين لو صنتوا العهد
كان أصبح كل الكون ده جنان
وفي عز ماكان الحلم وكان
انا لسه بدور ع الإنسان.