فتاة لـ"ثورة البنات": "مش بس الشباب المتحرشين.. كمان البنات"
قامت مبادرة " ثورة البنات "، اليوم الخميس، بنشر شهادة لفتاة تعرضت للتحرش الجنسى وذلك في إطار دور المبادرة في مكافحة هذه الظاهرة.
نص الشهادة:
أنا عارفة إن مجتمعنا صعب تعيش فيه البنت بحرية من غير ما عيون 90% من كل الرجالة اللى ماشين في الشارع تاكلها وتعرى كل حتة في جسمها بنظراتهم بس النهاردة اكتشفت حاجة غير كده.
كنت ماشية أنا وصاحبتى النهاردة رايحين عزاء والدة واحدة صاحبتنا كنا اصلا مخنوقين وزعلانين جدا ومش حمل حد يكمل علينا.. المهم ماشين في الشارع عادى (ومكنش شارع جانبى ولا في حتة عشوائية دة كان شارع كبير) المهم فجأة سمعت صوت توكتوك ورانا وفيه أصوات رجالة وستات عمالين يضحكوا بصووت عاالى وعمالين يقولوا" ايية كل ده" يالاهوى اييه كل ده" وده بصوت عالى وكلام تانى مقدرتش أفسره أوى بسبب أصوات الضحك العالى الكتير ومع العلم أن التوكتوك ده كان ماشى ورانا وصاحبتى تخينة شوية (مع أن ده بسبب ظروف صحية ليها) فاكيد فهمتوا كانوا يقصدوا إيه بس حتى لو مكنتش ظروف صحية هم مالهم... المهم انا اتخضيت من الصوت فوقفت كده وبصيت على التوكتوك بس صاحبتى مكنتش واخده بالها وكانت سرحانة علشان زى ماقلت كنا رايحين عزا... وبعدين بصيت على التوكتوك فشوفت راجل ((تخييييين جدا بردو)) قاعد جنب السواق.. وبنت قاعدة ورا نحو 20 سنة حاجة كده تقريبا كان قاعد جنبها ستات تانية مشوفتهمش أوى.
وفى وسط أصوات الضحك والكلام القذر لقيت البنت اللى كانت قاعدة ورا دى طلعت إيديها وراحت ضربت صحبتى جامد أكيد بردوا فهمتوا ضربتها إزاى... وطلعت اصوات ضحك من التوكتوك سمعت آخر الشارع وبعد كده طبعا التوكتوك جرى قبل مانفوق من الصدمة أصلا.
أنا بجد صعقت... بجد ملاقيتش حاجة أقولها غير إنى بصدمة كدة قلت بصوت عالى "اشحاال إنك بنت" بس مسمعتهوش كان التوكتوك جرى.....أنا كنت فاكره إن في فصيل من الذكور اللى بنشفها في الشارع عاوزة ولعة بس دة طلع المجتمع كله عاوز ولعة كلللللللللله... أنا بجد عيطت وصعبت عليا صحبتى جدااااا لأن هي مش تخينة بإديها واصلا كنا رايحين عزا ده غير قمة الإحراج وكان فيه "ذكور" شايفة الموقف وقاعدة تتفرج.
طب أنا لما أجى أمشى في الشارع دلوقتى أخاف على نفسى من مين ولا مين ولا مين ده حتى الأطفال مبقوش أمان ولا الستات... طب دى أنا لو كنا جرينا وراها واصرينا نوديها القسم كنا هنعملها قضية اييه دى؟؟؟ طب الرجل التخيييين جدا اللى كان معاها ده كان هيحس بإيه لو راجل تانى عمل فيه زى اللى كان بيضحك عليه لما البنت اللى معاه دى عملته.
أنا مكنتش ناوية أبعت الرسالة عشان مش شايفة إن ده هيعمل حاجة أو يغير حاجة وكنت زمان فاكره إن في أمل بس بصراحة ابتديت أتعب من تصديق فكرة الأمل دى.. بس أنا قلت ابعتها علشان يمكن تحذر بنات تانية وياخدوا بالهم وعشان أنا فعلا متغاظة.
