ابنك يقول لك "يابطل هات الخضار"

لو سمحت يابنى ممكن تقولى يامزة عشان خاطرى «غرامة 5000 جنيه لكلمة مزة»
ليه ياحاجة؟؟
مزنوقة في 5000 جنيه ضرورى يابنى


المعلم برعي مخاطبًا زوجته أم زينهم: العشرة جنيه عندك هناك فوق الترابيزة يا ولية زي كل يوم.. ها.. هاتغدينا إيه بقى النهاردة ؟!!
أم زينهم ممصمصة شفاهها: ودي عايزة كلام يا سبعي.. زي كل يوم وحياتك فول وطعمية برضه.. هو في غيرهم يا راجل !!
المعلم برعي هائجا: حرام عليك يا ولية دا أنا قربت أنهق من أكل الفول والطعمية.. كل يوم فول وطعمية !! ما الطعمية من الفول.. والفول من الطعمية.. حرام عليك.. نفسي آكل زفر.. حتة لحمة.. حتة فرخة.. رز قرديحي.. شوية خضار.. ارحميني شوية يرحمك ربنا..
أم زينهم ناظرة له من فوق لتحت: قال على رأي المثل.. يا جارية اطبخي.. يا سيدي كلف.. هو أنت سبت لي فلوس عدلة وجيت لقيت الأكل أي كلام ؟!! هي العشرة جنيه اليتيمة بتاعت كل يوم دي عايزني أجيب لك منها لحمة ورز وخضار ؟!! أنت عارف كيلو البطاطس وصل كام النهاردة ؟!!!
المعلم برعي ناظرا إلى الأرض: عارف يا ستي.. والنبي عارف.. كيلو البطاطس بستة جنيه.. بس مش لازم كيلو يعني نص كيلو ماشي.. ربع كيلو ماشي.. كله رضا لمن يرضى..
أم زينهم مشوحة في وجهه بيديها: نعم يا عمر نص كيلو ماشي.. وربع ماشي.. تاكل أنت وأقعد أنا وزينهم وأخواته وسته نمصمص صوابعنا ؟!! وبعدين النص كيلو ده ولا حتى الربع مش عايز له ع الأقل ربع كيلو زيت يتقلي فيه، ولو كنت هاتاكله مطبوخ مش عايز له شوية بصل وكام طماطماية يتقلب معاهم ع النار، ولو كنت هاتاكله مسلوق حتى.. ولو أنه مالوش طعم.. مش عايز له شوية ميه يتسلق فيهم ؟!! وأهو على يدك المية مقطوعة من خمسة شهور عشان ما دفعناش فاتورة العداد والغاز راخر خلصان من شهرين ومش عارفين نجيب أمبوبة من تحت رأس الأزمة، وشغالين بوابور الجاز اللي هبب الحلل وخلاها قطران.. أبيع لك عيل من العيال عشان تشبع وتملا بطنك يعني ؟!!
المعلم برعي: الصبر من عندك يا رب، ما قلنا خلاص العهد الجديد كله خير بإذن الله، والقشيا هاتبقى معدن وربنا هايفك كرب الجميع، دا الراجل ما بينامش لا ليل ولا نهار عشان خاطرنا يا جدعان، والحكومة شغالة بأيديها وسنانها يوماتي على الله لأجل ما تلاحق علينا وعلى طلباتنا، هم صحيح خاربين بيوت البياعين والعالم السريحة والأرزقية اللي على الله زي حالتنا، وبنجري نستخبى منهم في الشوارع الداخلية والحارات الضيقة، وأنا باجري بالقدوم والشواكيش وعدة الشغل عشان ما يصادروهاش مني وأدوخ عليها في الحي، بس آدي الله وآدي حكمته، واحد راجل مهم من اللي جه بعربيته وحملنا عشان نعمل له شغل في شقته، قال لي وحلف ميت يمين إنهم بكده بيعملوا لصالح البلد وعشانا وعشان مستقبل ولادنا.. والنبي ما أنا عارف الحكومة ها يجيلها إيه من قطع عيشنا ورميتنا في التخشيبة لو حد مننا بوق في ظابط ولا أمين شرطة من اللي بيصادروا بضاعتنا وأكل عيشنا !! بس جايز برضه.. وأكيد هم عارفين مصلحة البلد أحسن مننا وبكرة تشوفو مصر زي ما قال سيادة الريس، ربنا يخليه لينا يا رب ويساعده على العالم الإرهابيين والمتحرشين وولاد الكلب الخونة اللي بيحاربوا مصر وجايبنها وجايبنا ورا قادر يا كريم، والله الراجل ده بطل وإحنا كلنا أبطال ومصير ربنا ينصرنا ويجيبها جمايل.. ويعدل المايل..
وهنا يفاجأ برعي وزوجته بابنهما زينهم وقد خرج عليهما باكيًا يمسح آثار النوم من عينيه ليهجم على ساق أبيه ويتعلق بجلبابه صارخا: آبا.. أنا جعان.. يابا.. بلاش فول وطعمية النهاردة الله يخليك.. ابقى هات لنا معاك حبة رز وشوية خضار.