فاكرة يا حبيبتي لما !!؟

لمّا !
فاكرة يا حبيبتى لمّا...................؟
طيب مش فاكرة لمّا.................... ؟
يعنى نسيتى لمّا...........................!
طيب مش فاكرانى لمّا.............. ؟
ولا فاكراكى لمّا............. ؟
ازاى؟......... ده أنا فاكر كويس أنّك لمّا.........
أيوه...... لما كنّا جنب الشمندورة في المياه........ لمّا.........
أيوه أيوه.... والموجة والصخرة..... لمّا.....
والشمس لمّا غابت علينا والنورس لمّا غنّى....
أيوه بالظبط.... ساعة لمّا.....
طب واليوم اللى قبليها لمّا......
وتانى يوم بعديها برضه لمّا........
طيب بلاش....
فاكرة الوردة الحمرا اللى اديتهالك لمّا.. ؟
ولّا الوردة الصفرا......لمّا ؟
طب والوردة البيضا ساعة الصفا لمّا انزاحت الغمّة !
طيب فاكرة لمّا كنّا ؟
طب اشمعنى مش فاكرة بس غير لمّا...... ؟
وناسية لمّا.... ولمّا...... ولمّا ؟
أنا مش حافكرك لا بلمّا ولا لمّا ولا لمّا لمّا !
أصلك مش عايزة تفتكرى غير لمّا....
يعنى كل قولى ضايع ومالهوش أي لزمة
بس مش أصول أنك تلمّى علىّ الشمتانين فىّ دى اللمّة !