"وطن ونص" شعر لـ " سامح لطف الله "

يا وطن ما تقوم تصحصح
إنت ليها مدِّيها عكس؟
هيَّ ناقصة تبيع رخيص؟
ولاَّ ناقصة تبيع بِ وَكْس؟
ولآَّ بكرة ما عادش فارق؟
ف اللجان قضيها رقص
إنت شايف بكرة زيي؟
ولاَّ غمُّوا العين ب طَمْس؟
ولاَّ داير جوة ساقية
بير وفاضي وقالوا نقص
ياخدوا خيرنا لبطن غيرنا
لو تطالب يبقى رفص
وف قفايا يمشي مخبر
واللي ينطق يبقي عرص
اقطعوا حتى لساني
بالإشارة هقول واقص
الوطن هيعيش ونمشي
جوة رمشي جوة قلبي
جوة عيني وطن ونص!!