جمهورية الدوم!
أصابتنى دهشة عنيفة، لم تمُر بى من ييجى تلاتين أربعين قول سبعين سنة، وكدت ألطم على صداغى، وأشق هدومى كمان، وأنا أبحث عن صحة خبر مُطالبة الخال (عبد الرحمن الأبنودى) (بحبه وبقدَّره وكتاب الله بعيد عن الموضوع ده) بالإفراج عن البطل الشهيد أيقونة الثورة ورجُل العلم والإيمان والتكامل والتكافل والتفاضل (أحمد دومة) الذي قاد لوحده ثورة يناير، وأطاح بالنظام الفاسد لوحده، وسقط شهيدًا ييجى أربعتلاف مرَّة، وفقد أكثر من أربع أيدين ورجلين خلال أحداث العنف وموقعة الجمل، واتحرق أيام مجلس الوزراء واتفحَّم كمان، وبعدين في سهوة منه جالنا النظام الفاشل، فراح برفسة واحدة من رجلين سعادة جنابه طايح بيه هو كمان، وفأجاة.. قصدى فجأة.. الدولة غدرت بيه، وخلته ماشى على الرصيف، ملتزم بإشارات المرور، وحاطط القانون فوق دماغه، وهوب راحت ساجناه يا حينى!
وكتاب الله ما عندى مشكلة مع (دومة)، ولا أكرهه ولا أحبه، عادى يعنى، هو واحد زى المئات أو مئات الآلاف في البلد، له ما له وعليه ما عليه، وللعلم البعض يراه نبيًا، ماله ما إحنا في عصر الأنبيا، إذا كان سيدنا (جبريل) نفسه وصَّى على (محمد مرسي)، والنبى عليه الصلاة والسلام صلى إمام ورا (مرسي).. الله يرحم أيام اعتصام رابعة، والكلام اللى كان بيتقال فيه، والبعض يراه ـ (دومة) ـ شيطانًا رجيمًا، يستاهل الحرق بجاز وسخ..
عن نفسى لا أتطرف في كدة ولا كدة.. ده بنى آدم عادى، هاتقول لى ثورجى، ماهم كام مليون واحد خرجوا في يناير؟ (بلاش يونيو علشان بتوجع أكتر) المفروض كلهم يكونوا فوق القانون؟ بالعكس والله.. معظمهم انداس تحت الرجلين، واللى استفاد من يناير، هو اللى لعلط ع الفضائيات، وعبى الملايين في جيوبه، والناس اللى كانت بتلبس شبشب مقطع بصباع، وبقت دلوقتى تغيَّر البى إم دبليو كُل أسبوع، ربنا يزيدهم وكتاب الله ما عندى ضغينة، بس مش دول اللى عملوا الثورة لوحدهم، أومال اللى طارت عينيهم وأيديهم ورجليهم ورقابهم، واللى اتشردوا واللى اتيتموا، واللى روحوا بيوتهم في صمت، دول يبقوا إيه؟! هُبل؟ يمكن.. علشان سابوا نصيبهم من الكعكة لـ(دمومة) و(سموءة) و(سروءة) و(علوءة) و(مهورة) و(عدولة) و(نجورة) و(قرضوضة الكبير) و(قرضوضة الصغنن)!
طيب فين المُشكلة؟ مُشكلتى مع الخال (الأبنودى)، وكتاب الله لا خالى ولا أعرفه، بس بسمعهم بيقولوا عليه كدة، فمش عارف الخال ده حاجة كدة زى الباشا والبيه زمان، واللا حاجة برضو زى الأغا والشماشيرى زمان أوى يمكن، مُشكلتى ليست في حُب (الأبنودى) لابن أخته (أكيد دومة بيعترف إن الراجل خاله هو حُر)، اللى طالع يطالب بالإفراج عنه، كأنهم مسكوه بيسرق حبل غسيل، وبعدين اكتشفنا إذ فجأة إن حبل الغسيل دة جاى من بلكونة بيتهم، يعنى واحد بيسرق مُقتنياته، إذن براءة وِش..
أومال القوانين معمولة ليه؟ لما دولة بجلالة قدرها، تتحرَّك وتسن قانون، هاتقول لى قانون وِحِش، قانون بطال، قانون أعرج، أهو قانون، يمشى على الجميع، يا نولَّع فيه، مش نقطع إيد الغلبان والمسكين واللى ملوش علاقات اجتماعية ودوشة في التليفزيونات، وفلان خاله، وعلاَّن عمه، ومش عارف مين أمه في الرضاعة، ونسيب المشهور الواصل يخرق المرَّة دى (بالقاف) قانون التظاهر، ويخرق المرَّة الجاية (بالقاف برضو) قانون المرور، والمرَّة اللى بعدها يخرق البلد باللى فيها (بالهمزة لو عايز)..
وكُل مرَّة نقول بلا قضايا بلا أحكام قضاء وبلا قانون وبلا نيلة.. وافرجوا عن الراجل علشان الخال عايز كدة، ولا حَد عايز يقول إن دة حُكم محكمة.. يطلع برئ يطلع مُذنب نمشيها قانونى، مش نهاجم الفساد والواسطة، وبعدين نرجع نقول علشان خاطرى، واللا أصل أنا بحب فلان وشايفه ميستاهلشى السجن أو العقاب.. أومال المحاكم عملوها ليه؟ ما تعملوا استئناف، اعملوا نقض، اعملوا عمل على زلومة فيل، أو في أي حتة، بس شوية احترام للدولة اللى انهارت دى بقى!
طبعًا أخونا (حمدين صباحى) دخل في السكة، وعايز يفرج عن (دومة) برضو، ليه؟ مش عارف أهى أي هيصة وخلاص، والباشا اللى هايموت ويبقى رئيس، بيضرب القانون والقضاء بالقديمة أهو وإحنا لسَّة ع البر، أومال لو فلح ومسك الرياسة هايعمل إيه؟ طيب والله فكرة، ما نفرج عن كُل المساجين بالمرَّة، اشمعنى (دومة) يعنى؟ وأهى المساواة في الهطل عدل، اللى قاتل واللى سارق واللى مغتصب واللى خارق، عادى.. إفراج جماعى، ونقفل أم المحاكم في البلد دى، ونسرَّح الشُرطة والجيش وأهو توفير في النفقات برضو، ونبدأ بقى من أول وجديد على مية وسخة.. كُل جماعة تاخد لها خيمة واللا كهف في الجبل، ونمشى زى أجدادنا الأوائل عريانين من غير حتى ورق شجر، مُمكن اللى مكسوف يبقى يحُط ورق دوم.. ماهى أصلها بقت جمهورية الدوم!
