جامعة الدول "الغـربيـة"..!

بمنتهى الجدية كنت أتابع اجتماعات وزراء الخارجية العرب في جامعة الدول العربية، ممسكا بقلمى، وأمامى بضع أوراق بيضاء أدون فيها بعض الملاحظات والقرارات "المهمة"، التي من الممكن أن تغير شكل المنطقة العربية بالكامل.. خاصة أننا نعيش أجواء "الربيع العربى".. وفجأة اقتحم خلوتى "المفعوص" أبو نص لسان قائلا:
- انت لثه بتتفرج على أفلام "هندى"؟!
- هندى إيه يا "لِمِض".. إنت أعمى وكمان "كفيف"!.. دى اجتماعات جامعة الدول العربية..
- أيوه ما أنا عارف إنها جامعة الدول "الغربية"..!
- ياااااااه.. دانت حالتك صعب قوى.. وكمان مبقتشى تسمع.. بقولك "العربية"!
- لا أنا بثمع كويث قوى.. بث ممكن تقوللى "عربية" بأمارة إيه؟!
- بتضم كل الدول العربية..!
- ما أنا عارف.. والعدد في الليمون.. لكن إيه القرار إللى بتاخده الجامعة لثالح العرب.. كل القرارات المهمة لثالح "الغرب".. ومن ثاعة ما نبيل "الغربى" مِثِك الجامعة دى والخراب جاى على العرب..!
- اسمه نبيل "العربى" أمين جامعة الدول العربية..!
- لأ.. نبيل "الغربى".. أمين جامعة الدول "الغربية".. إنت ناثى إن الجامعة دى هي إللى ثمحت لـ"الناتو" بضرب ليبيا "الوطن" مش "النظام".. وخلوها "خرابة".. وهى نفث الجامعة بنفث الأمين العام بتطالب بتدخل "الناتو" في "ثوريا" بحجة القضاء على نظام "بشار الأثد".. والضحية هيكون الشعب الغلبان مش بشار وأهله.
- يعنى إنت عاجبك إللى بيعمله بشار في السوريين؟!
- طبعا مش عاجبنى.. بث نفث الجامعة ونفث الوزرا العرب مشفناش حد فيهم اتجرأ واتنحرر .. وطالب بتدخل "الناتو" ضد إللى بتعمله "إثرائيل" في "الفلثطينيين".. وإللى بيحثل في جنوب الثودان..!
- خليك متفائل.. أكيد الجامعة هتتغير بعد ثورات الربيع العربى..
- بأمارة إيه.. إحنا بننتج أكلنا؟!.. إحنا بننتج دوانا.. إحنا بننتج ثلاحنا.. لما ننتج الحاجات دى ابقى كلمنى عن التفاؤل.. وكلمنى عن جامعة الدول "العربية" لامؤاخذة..!