رئيس التحرير
عصام كامل
Advertisements
Advertisements
Advertisements
Advertisements

ساخرون.. إسماعيل ياسين فى 2020: آه يانى يا شلاضيمى يانى يا ماما

Advertisements

والنبى لتدخلى علينا برجلك اليمين يا 2020 يا طاهرة والنبى.. وبالراحة علينا دا إحنا مش ناقصين خالص وبتاتا البتة.. وكفاية علينا بلاوى 2019 وما قبلها.. إننى أشعر بالتمنى.. فاستجيبى ولا تُخيبى ظنى.

 

آه يانى يا شلاضيمى يانى يا ماما.. يعنى وحياة أبوكى انفخى في صورة منتخبنا الوطنى ومديره الفنى حسام البدرى، وكفاية الفضايح اللى حصلت لنا في 2019 وخروجنا من البطولة الأفريقية اللى هي أصلا كانت بتتلعب على أرضنا وبين جماهيرنا.

 

شى لله يا عم شوقى يا غريب يا موصلنا للأولمبياد.. ربنا ينفخ في صورتك وصورة منتخب الشباب وترجعلنا بميدالية من اليابان تفرحنا في 2020 كما فرحتنا في 2019.

 

والنبى يا 2020 عايزين إعلام يحترم عقولنا حبتين وكفاية بقى الصداع بتاع 2019 وما قبلها.. طب وحياة أبوكم يا جماعة يا هربانين يا بتوع الشرق ومكملين كفاية تنكدوا على أهالينا ليل ونهار بكلام فاضى لا يغنى ولا يثمن من جوع.. آه يانى يا جوعان يانى ياماما.

 

وحياة أبوكى يا 2020 مش عايزين نشوف فيكى الناس المصلحجية ولا الناس المطبلاتية ولا المنافقين ولا حتى المقللاتية.. احنا عايزين نشوف الناس المحللاتية اللى بتحلل بضمير.. آه والنبى علشان أنا شلاضيمى هتتفرتك من كتر الكلام في الموضوع دا بالذات.

 

والنبى يا 2020 انفخى في صورة الصحافة والصحفيين ورجعي لهم الريشة اللى كانت على رؤوسهم وذهبت مع الريح.. وانفخى في صورة العراق وخلصيها من الأمريكان والإيرانيين والداعشيين.

 

آه والنبى علشان نحبك يا طاهرة وماتنسيش تخلصينا من الطائفية اللى في لبنان والصهيونية اللى في فلسطين وتكونى على تونس عام سعيد وكذلك على السودان وليبيا والجزائر والكل كليلة.. وفيكى يا طاهرة تكمل مصر مسيرتها نحو الإصلاح والفلاح.

 

وماتنسيش يا 2020 إننا مع دخول معاليكى هنكون بنحتفل بمرور 9 سنوات على صدور جريدتنا "فيتو".. فخليكى خفيفة علينا وحياة أبو اللى جاب أبوكى.. وكل عام وفيتو بخير ورئيس مجلس إدارتها ورئيس تحريرها ومدير تحريرها ومجلس تحريرها ومحرريها وكافة العاملين بها وقرائها جميعا بخير وتصبحون على خير والسلامو عليكووووووووووووو

Advertisements
Advertisements
الجريدة الرسمية