مأساة "حباظة".. واقعة تكشف قسوة المجتمع تجاه مصابي متلازمة داون (صور)

تداول نشطاء عبر موقع التواصل الاجتماعي "فيس بوك" صورا لصبي مصاب بمتلازمة داون، يتعرض للتنمر والإيذاء من قبل عدد من الشباب بأحد شوارع القاهرة القديمة بشكل شبه يومي.

ونشر أحد النشطاء ويدعى محمد يسري عبر صفحته الشخصية صورا للصبي، وعلق قائلا: "أنا امبارح اتعرضت لأسوأ تجربة ممكن حد يتعرض لها.. كنت باكل في مطعم الساعة ٧ الصبح أنا واخواتي البنات وجوز أختي وولادهم، وكان في نحو ٦ شباب من العيال اللي بيطلق عليهم سرسجية نازلين ضرب واستفزاز في الولد اللي عنده متلازمة داون اللي في الصورة ده، بالمناسبة اسمه "حباظة".

تابع قائلا: "الحفلة اكتملت بإرهاب مكتمل الأركان لما جه المراهق اللي في الصورة ده ومعاه كلب چيرمن شيفرد وشرس وفضل يهدد بيه الولد ده ويجري وراه بالكلب فترة طويلة في وسط ضحك وكركره من كل الموجودين وصمت غريب من اللي شغالين في المطعم".

واصل: "انا كنت هقوم اتخانق وادافع عن الولد واللي حاشني جوز اختي لأنه ممكن يتعمل عليا حفلة أكبر من اللي بتتعمل على الولد الغلبان واللي سكتني أن معايا ستات وأطفال وخفت عليهم من البهدلة، مسكنا الاستاف بتاع المطعم هزئناهم لأن اللي حصل حصل على ترابيزاتهم وتحت عنيهم حتى محاولوش يمنعوا ده يحصل على مطعمه، وأنا حاولت اوصل قسم باب الشعرية امبارح عشان اقدم بلاغ في اللي حصل بس للاسف انا مليش صفة عشان اقدم البلاغ، منطقة بحالها كانت ملمومة بتضحك على اللي بيحصل مفيش واحد فيهم عنده نخوة يقولهم عيب، نفس الناس اللي هتنتفض لو واحدة لابسة كت، نفس الناس دي اللي هتنتفض لو واحد حط ايده على كتف واحدة.

واختتم قائلا: "ارجوكم شيروا البوست عشان الولد اللي في الصورة ده واللي معاه يتجاب والكلب معاه ده يتحجز في الرعاية البيطرية أو أي جهة مختصة"، تعديل حسب ما وصلني عن حباظة:
١- الحفلة دي شبه يومية على الولد
٢- الولد اللي معاه الكلب ده معتاد التصرف كده وعمل كده بعقرب في مرة من المرات في وجود ناس تانية
٣- اللي تعبني ووجعني لما خلصت الحفلة القذرة دي قمت طبطبت عليه وأخذته في حضني واديته فلوس وكانت دموعه على خده بتوع الطعم بيقولولي أصله بيهزر معاهم.. تخيل التبرير القذر اللي شبه أصلها لابسة عريان".