إسماعيل ياسين في حزب الوفد: "شى لله يا سيد يا بدوى"

آه يانى يا شلاضيم بُقى يانى ياماااااما.. إننى أشعر بالانصداع.. آه يا أدمُغى يانى يا أيها المتصدع.. الحقونى من الصداع اللى عاملهولى "السيد البدوى" ربنا يجعل كلامى خفيف عليه.. شى لله يا سيد يا بدوى يا ساكن حزب الوفد.. ربنا يبشبش الطوبة اللى تحت راسك

الراجل اللى اسمه السيد البدوى ده.. قصدى اللى اسمه الدكتور ورجل الأعمال ورئيس حزب الوفد السابق السيد البدوى.. آه والنبى دى المقامات محفوظة برضه.. شى لله يا صاحب المقام الطاهر.. ويا أم المطاهر رشى الملح سبع مرات.. علشان الراجل ده هيجننى ويبوظ صواميل عقلى منى، يعنى مش كفاية إن حزب الوفد اللى بنفتخر بيه أفلس في عهده، لأ ده كمان بيكتب شيكات بدون رصيد وبيتسبب في إفلاس الشركات وناس ملهاش في السياسة، ولا لها في التكهنات والثعلب فات وفى ديله سبع لفات

الحقنى يا عفركوش يا ابن برتكوش.. إنها هزلت وذبلت وتنيلت بستين نيلة.. يبدو أن هذا الرجل هو الذي بّوّظ السياسة والفن والبيزنس كمان.. ورغم كده عايش ولا في دماغه حاجة.. قضايا شيكات بدون رصيد بالجملة وبرضه ولا هو هنا

إنه يستمتع بالملايين، في حين أن ضحاياه بيقولوا عشانا عليك يا رب.. ورغم ذلك لم يتم القبض عليه في كل تلك الاتهامات.. والتعلب فات وفى ديله سبع لفات

طب وشرف عمى اللى اشترى التروماى.. إننى أشك أن البدوى هو الذي باع لعمى العتبة الخضرا والمطافى والسكة الحديد.. نعم إننى أشك وبعض الشك يكون في غير محله.. إن عقلى سيتوقف عن العمل.. الحقونى بقزازة نشادر تفوقنى والنبى.. فيبدو أن هذا الرجل يستحل أموال البشر.. آه يا دهوتى السودة يانى يابابي

إننى أدعو حزب الوفد العريق لنزع صورته من بين صور قادة الوفد أحفاد سعد زغلول العظيم.. فالحزب الذي طالما ناضل زعماؤه ضد الفساد لا يمكن أن يأوى من وجهت له الاتهامات بالفساد.. حتى ولو كان هذا الفساد على هيئة شيكات بدون رصيد.. وكفاية عليكو كده.. ويلا بقا.. سلامو عليكووووووووووووووو