بهلول المشغول: الحق ع الحكومة

نفسنا بس نعرف
امتى فيكي هنعيش
ومنحسش إننا أضعف
حتى من لقمة العيش

نفسنا يا مصر تبقي
على ولادك حنونة
ليه خيرك مستخبي
حتى الطماطم مجنونة

البطاطس بـ5 جنيه
والبامية بنفسها مفتونة
الخضار سعره زاد
وكمان سعر اللمونة

وأنا عمكم بهلول
اللي بيكم مشغول
عمال ألف وأدور
نفسي ألاقي حلول

لكني تهت في الزحمة
زيكم ملقيتش رحمة
نفسي أشتري فرخة
أو حتى ربع لحمة

دا حتى أم العيال
مابقتش تيجي جمبي
قال إيه زاد الدولار
ومابقتش الدنيا بمبي

ماشي يا ست سومة
الحق مش عليكي
الحق ع الحكومة
خلتني مش مالي عينيكي