شلاليت عم فريد

رشحت نفسى في مجلس شعب مصراوي
وسقطت في الانتخاب علشان أنا هــــاوي
الطبل والزمر والتنطيط كما الحاوي
وناوى أنزل وأرشح نفسى من تاني
لو ألف مرة لأنى للعراك غاوى
0000000
أنا أصلى غاوى السياسة ولعبة الكرسى
ومركبى في كل حتة ع الشطوط ترسي
أحب أكون شخص بارز حلو مش منسي
أعرف أكون كل حاجة بين جميع الناس
شرقى وغربى وأمريكى وعربى وفرنسي
000000
أنــا كل مــرة أرشح نفسى في انتخابات
أسقط وأنسى اللى عدى من سنينى وفات
وأرجع أرشح لنفسى وأسأل الأموات
أصواتكم إنتم تنجحنى بدون أزمات
لو تقدروا تصوتوا أنجح وأكون شاكر
لكل واحد وأجيب للميتين شربات
00000
نفسى أكون مرة عضو بمجلس النواب
والناس تشوفنى وأنا واقف على الأبواب
في مجلس الشعب ماشى أصافح الأحباب
وأكتب في كل الصحف وأنشر بتليفزيون
واسمى يبقى فريد بين كافة الأحباب
00000000
فيه حد عايز يقول حاجة بدون إحراج
ونفسه ينعى غريق مثلى بين الأمواج
ويقول لنا نعمل إيه م القاهرة لسوهاج
يا مجلس الشعب نفسى أعرف حتعمل إيه
مع كل مظلوم وظالم يطلب الإفراج