«المجنون».. شعر هناء نوار

من النهاردة انا واحد تانى
قرر إنه يكون مجنون
بسأل نفسي انا ليه وحدانى
و حاسس زى ماكون مسجون
كل الكون قاعد بيغنى و يرقص فالس
و انا خيبان و ماليش فِ الرقص
جواية حزن لكن مدفون
كُتر الخوازيق اللى باخدها
قلبت عندى بعقدة نقص
طب ليه ماعشِّ كما العايشين
و أدّلع .. و أشوفلي يومين
ما الحياه إلا .. هَجْص ف هجص
راح أدُق الأحزان فِ الهون
و اضرب أوى و حاشوط فِ الجون
و انشر فِ الجرنال خبرين
أولهم : مات الإحساس
و تانيهم : ملعونة الناس
و حاسلسل كل الشياطين
راح أعبّي الحب ف قرطاس
و حا ادوّب أحلامى ف كاس
و أقسم نفسي و اكون بروحين
لا انا سلعة بتتباع و رخيصة
و لا أراجوز داير فِ الهيصة
أنا عارف رايح على فين
ناوى اطيح فِ الكل و لا هاممنى
و آخد حقي من اللى ظلمنى
و حادوس ع الخوف اللى قاتلنى
و كله بشرع الله و الدين
مِ اللحظادى .. بقيت مجنون