"ربــاعــيـــــات" للشاعر الشاب محمد أحمد إبراهيم

ننشر رباعيات للشاعر محمد أحمد إبراهيم:
"المضمون":
ورغم خلافنا ع المضمون
وع الظاهر وع المكنون
يظل الحب شيء وارد
في عز الاختلال موزون
..
"الفعل أمر":
طلبوا الجحود والفعل أمر
كشفوا الوشوش ومعادش صبر
ولا شيء جديد أستغربه
م الفاكهة ممكن تبقى خمر
..
"التوهة":
بَخَاف مِن تُوهةَ تِخطَفني
وتِسرَح بِيّا لو قِدرِت
أنا وَاحِد وعَاش في الحِلم
ومَات لَّمَا العِيوُن صِحيِّت
..
"تناقض":
مبتألمش ولا بفرح
ومتكتف ف وسط براح
ورغم طريقي لسه بتوه
ورغم الراحة مش مرتاح
..
"أنا الحُر":
ما بِين خُوفَك وتَفكيِرك
وِكُون ما يِسيعْ بَشَر غِيرَك
ولَفظ الحُر عاش فِكرة
وشيء مَحسوب على ضَميرَك
..
"مفتاح الفرج":
حضنك ده نعمة من النعم
وأنا حضني مرفوع الحرج
قالوا عشقت... أقول نعم
ده العشق مفتاح الفرج