"خبطني بالسيناريو على وشي"، إلهام شاهين تكشف سر خلافها مع خان في "أحلام هند وكاميليا" (فيديو)

كشفت النجمة إلهام شاهين عن موقف جمعها بالمخرج الراحل محمد خان، مؤكدة أنه تسبب فى تركها فيلم “احلام هند وكاميليا” وعدم عملها معه مرة أخرى.

 جاء ذلك خلال ندوة "رجال محمد خان.. أبطال خارج المألوف" المقامة حاليًا ضمن فعاليات مهرجان الجونة السينمائي في دورته التاسعة، وبحضور كل من النجم حسين فهمي، والمخرجة نادين خان ابنة المخرج الراحل، والفنان أحمد داود، والناقد أحمد شوقي، ويدير اللقاء الناقد رامي عبد الرازق. 

إلهام شاهين: محمد خان رفض سفري قبل التصوير وفسخ شغله معايا

وأوضحت إلهام شاهين فى مستهل حديثها أنها فى شبابها كانت عنيدة للغاية، موضحة: “كنت بحب أكابر حتى لما كنت بعمل حاجة غلط، كنت بقنع نفسي إنه صح، كنت المفروض اشتغل مع محمد خان فى "أحلام هند وكاميليا"، أنا ونجلاء فتحي قعدنا حوالى شهر ونص بروفات، كان وقتها شغل حقيقي وسينما بجد وتعب بجد".

وتابعت الممثلة: “وبعدين كنا خلاص، خلصنا البروفات وهنصور بعد ٣ أسابيع، قُلت له أنا هسافر وهاجي على التصوير، ولكنه قال لى: لا ممنوع تسافري لأن أنا المخرج عايزك فى أي وقت، الممثلة بتاعتي ممنوع تسافر.. لازم تكوني تحت أمري، لما اعوزك أو أكلمك ألاقيكي”.

وأضافت: “قُلت له مش المفروض أقولك.. لما سألنى هتسافري ليه، افرض دي حاجة شخصية!، راح قايل لي: أنا قررت أبدأ تصوير بعد أسبوع، قُلت له التوقيت ده مش هينفعني".

وأكدت الممثلة أن رد فعله عقب اعتراضها كانت بـ “خبط” السيناريو فى وجهها، ورفضه عملها معه فى الفيلم، موضحة: “قال: وانا مش هينفعني تشتغلى معايا، وقام خبط السيناريو فى وشي ونزل".

إلهام شاهين: محمد خان كان بيشوفنى أحسن ممثلة فى ذلك الوقت

وعن علاقتهما عقب هذا الموقف، أكدت إلهام شاهين: "كان يشوفني فى أي حتة يبص لى بقرف ومايسلمش عليا، ولما سافر فيلم "يا دنيا غرامي" مهرجان قرطاج كان محمد خان هو رئيس لجنة التحكيم، قُلت هياخد موقف منى، وهيبقي ضدي أكيد، ولكني اتفاجئت إني حصدت جائزة أحسن ممثلة فى السنة دي".

وتابعت: “ولما سالته، قال لى: إني اكرهك في طباعك الصعبة ودماغك الناشفة حاجة، ولكن اني أشوفك أحسن ممثلة ده حاجة تانية، ولو كنتي عملتي (أحلام هند وكاميليا) كنتي هتاخدي جوائز أكثر".

وأكدت الممثلة أنها اعتذرت له يومها عن الموقف القديم، وطلبت منه العمل معًا مرة أخرى، ولكنه رفض ذلك.