إلهام شاهين: أنا اللي غسلت أمي ونمت بجوارها بعد وفاتها لحد الصبح (فيديو)

تحدثت الفنانة إلهام شاهين عن علاقتها بوالدتها، قائلة: "أمي كانت كل حاجة في حياتي، وكانت السند والصاحبة والحبيبة وهي اللي بتوجهني في كل خطوة وما تخيلتش أبدا إن هي ممكن تسيبني في يوم من الأيام".

وأضافت خلال لقائها ببرنامج "بين السطور"، تقديم الإعلامية يمنى بدراوي، المذاع على فضائية "TEN": أنا اللي غسلت أمي بإيدي ونمت جنبها بعد وفاتها لحد الصبح وما كنتش خايفة أبدا بالعكس كنت حاسة بسلام رهيب، كنت عايزة أشبع منها لآخر لحظة وأحس بوجودها جنبي لأنها كانت الحماية والأمان بالنسبة لي وفراقها كسرني جدًا وما زلت لحد النهارده بفتكرها في كل لحظة وبحس إن روحها حواليا وبتحميني، وقعدت 10 سنين وأنا ألبس أسود على أمي".

وقالت الفنانة إلهام شاهين: "أنا قسيت على نفسي كتير وجهدت نفسي في الشغل وفي التفكير وفي المسئوليات ونسيت إن لنفسي علي حق، أوقات كنت بضغط على أعصابي عشان أرضي اللي حواليا وعشان شغلي ينجح وكنت بنسى إلهام الإنسانة ومحتاجة إيه"، مضيفة: " بعشق سعاد حسني الله يرحمها، وبحس إنها كانت كتلة أحاسيس ومشاعر بتمشي على الأرض وكان عندها صدق رهيب في كل حاجة بتعملها وبحب كمان فاتن حمامة في رقتها وشخصيتها القوية المحترمة والاتنين دول مدرسة كبيرة اتعلمت منها كتير ولسه بتعلم ".

وعن كاتم أسرارها، أو ما يطلق عليه الصندوق الأسود لأسرارها، أكدت الفنانة إلهام شاهين: " أختي إيناس هي توأمي روحي وبتحس بيا من غير ما أتكلم وبقولها كل حاجة وأنا مطمنة جدا لأنها أكتر واحدة بتخاف عليا وبتحبني بجد من غير أي مصلحة، إحنا عيلة مترابطة جدا وده اللي بيخليني قوية ومستمرة".