يمكن خير، عمرو مصطفى ورامي صبري في أول مواجهة على الهواء بعد أزمتهما (فيديو)
عمرو مصطفى ورامي صبري، واجه المطرب رامي صبري، الفنان عمرو مصطفى على الهواء، بعد أزمة حذف أغنية يمكن خير من يوتيوب بسبب اتهامات بسرقة اللحن.
مبادرة رامي صبري لعمرو مصطفى
وقال رامي صبري خلال مداخلة هاتفية ببرنامح "أجمد 7" المذاع على إذاعة نجوم إف إم: “يا عمرو مصطفى انت عارفني كويس من زمان جدا أنا راجل ولا ليا في المشاكل ولا برد على حد، وانت ملحن عظيم وكبير من قبلي وده كلام من قبل ما اشتغل الشغلانة انت نجم في المزيكا وكلنا كفنانين في مصر نفتخر إن فيه واحد زي عمرو مصطفى موجود في مصر”.
وتابع: “الاختلاف في الطريقة بتاعت الانتقاد، ولو رامي حتى خد منك حاجة إحنا بنتكلم مع بعض على التليفون والواتساب، وعمري في حياتي هطلع أغلط فيك ولا هيتم استدراجي في برامج للهجوم عليك، ولكن زي ما انت بتحافظ على اسمك وكيانك أنا كمان زيك، وأنا هتضايق لو حد قلل مني، واتضايق اني اطلع اتكلم علي حد مهم زيك لإني احب اظهر وسط الناس اللى بتقدر الموهبة والنجم اللي زيك”.
وأكمل: "لازم نظهر قدام الناس اننا معلمين للجيل الجديد مينفعش نظهر بشكل مش كويس حتى لو عندنا خلاف مع بعض، وهفكرك بمحمد رحيم لما طلع قال ان الاغنية شبه مش عارف ايه وانت طلعت هاجمته وانا اختلفت معاه وهاجمته علشان خاطرك ومن زمان اوي بدافع عنك وبقول ده احسن واحد في الدنيا حتي لما حذفت الأغنية بتاعتي على يوتيوب وكنت بقول اكيد مش عمرو مصطفى اللى عمل كده".
تعليق عمرو مصطفى
وعلق الفنان عمرو مصطفى:"رامي صبري أخويا، ولو خاننا التعبير علشان ولادي وأولادك متزعلش بس الكلام اللي انت قلته كان صعب، انت برضو بتتحارب وعارف كده، علشان نبقى معلمين للجيل الجديد المفروض انك كنت قلت ده ألحان عمرو مصطفى ورامي صبري، علشان الجيل الجديد مياخدش مننا جمل لحنية وانت أول واحد باركتلي على أغنية رقصة، خلاص يا رامي حصل خير".
وتابع عمرو مصطفى: "اعترف قدام الدنيا كلها انك يا رامي صبري اكتر واحد داعم ومساند ليا واي حد بيضايقني انت بتدافع عني".
ووجه الفنان عمرو مصطفى، رسالة للمطرب رامي صبري، قائلا:"أنا لو غلطت فيك يا رامي كنت هطلع اعتذر ومش هاخجل ومش هيبقى عندي أنا ولا غرور ومش هتكسف من أي حد وهبقى فخور بنفسي إنما مش هنام بالليل وأنا مضايق حد".
وتابع عمرو مصطفى قائلا " وقصة المغرور دي تسببت لي في أزمات بحياتي والجمهور اذاني لما اتهمني بالغرور فابتديت انزل لحد لما بقى يتطاولوا عليا من قبل بعض الفنانين وأنا مش هقبل بالتطاول، ولو انت بتقارن بالميزان هخلي الجمهور يقول أنا نجاح 5 شهور من بداياتي لما نزلت كملحن كان كوبري اكتوبر بتاعي بالتاريخ بتاعكم كله وده مش غرور دي حقيقة وأرقام".
رسالة عمرو مصطفى لرامي صبري
وأضاف خلال لقائه ببرنامج "أجمد 7" المذاع على إذاعة "نجوم إف إم":"يا رامي صبري انتم استبحتم ألحاني، ازاي عايزني متكلمش، وأنا طلعت اتكلمت اني اتسرقت محدش يكررها تاني لا قريب ولا غريب، وأما صعد ضدي في تصريحات الاعلامية كان لازم اتحرك ضده بعد سرقة لحني في اغنية يمكن خير".
خطأ رامي صبري في حق عمرو مصطفى
وتابع:"رامي صبري طلع قال انا ممكن اقعده في البيت، مين اللي يقعد مين في البيت؟ ازاي جت في خياله؟ في الخيال جت ازاي للحظة فكر يقول كده؟ قال انا خريج حقوق وهو متخرج من معهد الموسيقى العربية طيب هو بليغ حمدي خريج ايه كان خريج حقوق زي، بليغ حمدي حقوق".
سر حذف عمرو مصطفى أغنية رامي صبري
وأكمل:"امبارح بالليل بعد لما حذفتله الأغنية من على يوتيوب قسما بالله كنت متضايق ولحد دلوقتي متضايق، وعايز أقوله اهدأ القصة مش انت هما بيشغلوني بيك، القصة هما 3 في الوسط الموسيقي وبيسخنوه وبيستغلوه، ومعنديش مشكلة في فتح صفحة جديدة مع رامي صبري".
نجاح رامي صبري وحماقي
وتابع:"عايز أقولك يا رامي صبري أقسم بالله نجاحك من نجاحي ونجاح محمد حماقي من نجاحي ونجاح أي فنان من نجاحي، أحمد سعد معملتوش ولا اغنية بس اكتر واحد دافعت عنه، شيرين عبد الوهاب طلعت قالت ياريت يا عمرو مصطفى متغنيش تاني صوتك وحش وانا أول واحد كنت واقف معاها في ازمتها بمنشور انا الوحيد في مصر، وانت يا رامي لو لا قدر الله حصل معاك حاجة هاكون أول واحد واقف معاك وبقوله متخليش الناس تفرح فينا وانا قلت يا جماعة أنا مبهزرش وأي حد هيصعد قصادي مش بهزر".
عمرو مصطفى ينهى خلافه مع رامي صبري
وأكد:"قررت إني مش هصعد ضد رامي صبري ولا هقيم دعوى قضائية ضده بسرقة لحني والأغنية اللى حذفتهاله هرجعهاله تاني، وأنا بحب البني اَدم ده على المستوي شخصي بس مينفعش حد يبوظ هيبتي في المزيكا".
--------------------------------------
نقدم لكم من خلال موقع (فيتو) ، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
