هو هو متغيرش.. بابا حنين (11)
كل يوم نصحى نشوف أسعار الدولار عاملة إيه؟، وأسعار اللحمة والفراخ والسمك وكل أنواع الأكل عاملة إيه؟، ونفكر في كل يوم مجرد ما نصحى من النوم، هنعمل النهارده وهناكل إيه؟، وهنتصرف في فلوس الحاجات المطلوبة مننا إزاي؟، ولو طالب فإنت بتفكر في الإمتحانات اللي وراك، ولو زي حالاتي مغترب تفكر هترجع إمتى وإزاي؟، وندخل جوة دوامة تهلكنا وتخلينا على آخر اليوم نبقى شبه الميتين بسبب القلق.
لكن أقولك سر؟ ربنا اللي شالك امبارح وضمنلك عيشتك وعيشك وخلاك متحتاجش لحد امبارح، هو نفسه اللي بيعولك النهاردة وهو اللي هيعولك بكرا وهيعول كل أيامك، ومش هيخليك تحتاج لحد، لكن إحنا اللي بنحب نعيش في قلق ونعيش في دوامة بتسحب من روحنا ومن آمانا مش بتفيدنا في أي حاجة خالص!
في رسالة العبرانيين نلاقي الكتاب المقدس بيقول عن ربنا: "يَسُوعُ الْمَسِيحُ هُوَ هُوَ أَمْسًا وَالْيَوْمَ وَإِلَى الأَبَدِ"، يعني الله ثابت مبيتغيرش، يمكن الأيام هي اللي بتتغير، ويوم يبقى حلو جدًا، ويوم يبقى وحش جدًا -وطبعًا ده كله من وجهة نظرنا-، لكن يفضل ربنا حلو وصالح لكل يوم وشايلنا في كل يوم مبيتغيرش.
ومادام الله موجود، يبقى الخير موجود في حياتنا وفي كل يوم بنحياه معاه، لأن الكتاب قال عنه: "يُشْبعُ بِالْخَيْرِ عُمْرَكِ"، الخير سواء أنه يسدد احتياجاتك، أو يبعد عنك آذي وشر كبير، اطمن مادام الله في قلبك ومادام حياتك في إيده، لأن الله صالح ومراحمه جديدة في كل صباح.
Instagram: @PaulaWagih
