يوميات فاهم وفهيمة... حلقة رقم (25).. مرسي مرعوب!

فاهم: مرسي مش عاجبني يا فهيمة تحسي كده إنه مرعوب من حاجة وتحسي كمان على طول سرحان ومش مركز
فهيمة (تتنهد): كان الله في عونه كتر خيره الحمل تقيل عليه
فاهم (يضرب كفا بكف): لا حول الله حمل إيه هي الست حامل؟ لا كده الله يعينه والله صعب علي 
فهيمة (مستغربة): حمل إيه وحامل إيه يا عم؟ باقولك المسئولية، هو انت كل حاجة بتفهمها غلط كده؟ والله كتر خيره الواد فهيم مطلع عينك
فاهم: طب طالما هو مش قد الموضوع مش كان في بيته معزز مكرم يعني كان ريح واستريح
فهيمة: ده قدر يا سي فاهم واختبار من رب العالمين
فاهم: هو فعلا اختبار من رب العالمين بس للشعب مش للريس مرسي بس عاجبني في الحركة بتاعة إنه نزل من العربية وهات يا تشجيع مرسي مرسي هو هو فكروني ببرسيل
فهيمة: مرسي يستاهل كل خير والله ما في زيه شفت لما حب يهدد إثيوبيا عمل إيه جاب أنصاره وعشيرته وأحبابه وقالهم هما دول رجالته دة ذكاء يحسد عليه عشان محدش يقول ضحى بالمعارضة
فاهم: لأ بصراحة حاجة تكسف واللي فقع المرارة بتاعة الشعب كله الخليفة بتاعة النيل يا نهار هو عايز يحسرنا على المية ولا دي تصبيرة ولا إيه بالظبط.
فهيمة (تضحك وتضرب كفا بكف): شوف انت فهمت إيه وأكيد عامة الشعب زيك كده فهموا الأمور غلط، هو يقصد يا حبيبي رسالة إلى إثيوبيا إن الميه لن تقطع الميه في زمن الإخوان والدليل الصورة دي، فهمت؟
فاهم: شوفتي إزاي وأنا اللي ظلمته لا حول الله فعلا ذكاء خارق الله أكبر.
فهيمة (حزينة): مش انت بس اللي ظالمه ده الشعب كله ظالمه ونازلين يوم 30 لخلعه.
فاهم: مش خلع وانت الصادقة طرد من الحكم ونسميه المطرود
فهيمة: عشان كده يا حبة عيني وشه اصفر ومرعوب وشغال يشرب كركوم لما هيقلب اصفر خالص وبتجيله كوابيس والحاجة قالت كل ليلة يقوم مفزوع ويصحى على كابوس لما جاب ليهم العصبي.
فاهم: ربنا يخلصه من الكوابيس ويخلصنا منه تعرفي لو ساب الحكم لوحده والله ما يشوف ولا كابوس بعد كده أبدا وتحدي حتى خليه يسأل مبارك كده ويقول له من يوم ما دخلت السجن شفت كابوس واحد أبدا.
فهيمة (تمصمص شفايفها): معقولة بعد ما عيشته ارتاحت يرجع تاني للغلب والحزن والجامعة ورئيس الجامعة يتحكم فيه لا طبعا مستحيل.
فاهم: إذن لا يلومن إلا نفسه وموعدنا يوم 30 واللي يزعل نسلخ وشه ونلف بيه البلد مربوط على حمار، والعيال تزفه وتقول من ده بكرة بقرشين.