أطرف المواقف «الغبية» لمستخدمي «فيس بوك».. خلود: صليت من غير طرحة.. جنة: كتبت اسم الدلع في استمارة الثانوية العامة.. إيهاب: رميت شنطة الشغل في مقلب الزبالة.. وحبيبة: حطيت أجرة النا

أثار مستخدمو موقع التواصل الاجتماعى «فيس بوك» ضجة بروايتهم لأطرف المواقف التي تصرفوا خلالها بغباء، وجاءت المواقف عبر تعليقات صفحة «الكومنت الفصيل» على الموقع.

اسم الدلع في استمارة الثانوية العامة
قالت جنة: «أحكي عن إيه وا إيه ولا إيه، عن استمارات الثانوية العامة اللى كتبتها تلات مرات بسبب إن أول مرة كنت بذاكر تاريخ دخول المسيحية مصر، وبعد ما ذاكرت كتبت الاستمارات وكتبت في خانة الديانة مسيحية، تانى مرة جالى الاسم أو اللقب كتبت جنة بين قوسين "جوجو" كنت فاكرة إن اللقب يعنى اسم الدلع».

دفعت الأجرة مرتين
وكتب محمد: «دفعت الأجرة مرتين والسواق طول الطريق يقول يا جدعان في واحد زيادة في الأجرة، وأنا أزعق مع الناس وأقولهم يا جماعة كل واحد يشوف فلوسه، فالميكروباص كله لقيته بيبصلي وبيقولي طب بص ف فلوسك إنت كده، الحمد لله لقيت أنا اللى دافع الأجرة مرتين، اللى في الميكروباص فضلوا الطريق كله يضحكوا عليا».

صليت من غير طرحة
فيما ذكرت خلود: «مرة كنت بصلي المغرب، وخلاص في تاني سجدة افتكرت إن وضع القبلة غلط، المهم قطعت صلاة وبدأت من أول وجديد، جيت في تاني سجدة افتكرت إني بصلي من غير طرحة، أقسم بالله حسيت إني أغبى مخلوق في الأرض».

موقف غبي مع معيدة
كتبت ناهد: «واقفة قدام الشئون، الراجل مش راضي يديني النتيجة علشان محجوبة، ففي واحدة كانت واقفة قالها تاخديها دلوقت، قالتله أي حاجة براحتك، رحت أنا زقتها بأيدي كدة وقولتلها خديها دلوقتى أحسن يرجع ف كلامه، لاقيت صاحبتي بتقولي يخربيتك دي معيدة ف الجامعة إنتي هتصاحبيها».

حطيت أجرة الناس في جيبى
علقت حبيبة: «راكبة الميكروباص وكان معايا تليفون واحد إداني خمسة جنيه ادفع خمسة، خدت الخمسة جنيه كلها حطتها في الشنطة، ونسيت خالص السواق طول الطريق يشتم على اللي مدفعش الأجرة، وياجماعة الأجرة ناقصة ٥ أنفار والنَّاس تشتم والسواق يشتم، وأنا أقول يا جماعة اللي مدفعش يدفع المهم، قالوا نرجع كل واحد أجرته، طلعت الخمسة جنيه اللي حطتها في الشنطة، موت على نفسي من الضحك، قولتلهم لو حلفتلكوا إني مش نصابة محدش هيصدقني، بس الحمدلله صدقوني ومضربتش».