بختك اليوم "السبت" من هريدى نيوز

يتكون محظوظ يتكون منحوس.. مع بختك فى هريدى نيوز:
-الحمل:
عشان ما تعلا وتعلا وتعلا.. لازم تطاطى تطاطى تطاطى.. ولو تعبك كتر الغاز بطله واضرب مطاطى.  
_الثور:
الألعاب السحرية ليها ناسها، وخفة اليد مش هاتجيب نتيجة، جرّب تجيب هدية يمكن تنفع، وأحيانا النفاق بيجيب فايدة.  
_الجوزاء:
حياتك شبه الأفلام وانت فيها النجم، يوم فوق ويوم تحت، بس النهاية دايمًا سعيدة، والبطل بيحقق أحلامه.  
_السرطان:
اللى ما تحتاجش النهاردة لوشه، بكرة تحتاج لقفاه ولا مؤاخذة.. وإن كانلك عند الدلو حاجة قوله يا شفشق.  
_الأسد:
القرعة تتعايق بشعر بنت أختها، وانت عندك شعر كتير، مالك ومال الناس وأفعالهم؟!!
_العذراء:
قليل الحظ لا تعاتبه ولا تلومه، ده بخته مال ولو بقى سيد قومه.. إنت برنس وهتفضل طول عمرك برنس.
_الميزان:
إيش تعمل النهضة فى "ميزان" معووج.. ولا تجادل ولا تناقش إنت وقعت فى الفخ، بس فيه أيام حلوة جاية.  
_العقرب:
يا واد يا تقيل.. التقل صنعة وكده كفاية، بدل ما تلف ورا اللى بتحبه وتقول لنفسك أنا اللى ادتنى على قفايا.  
_القوس:
قالوا للحرامى احلف قال جالك الفرج، يا "قوس" كنت ملك زمانك وحاسس بكيانك وإيه اللى غيّرك؟!
_الجدى:
كل فولة وليها كيال، ولو إن الفول غالى اليومين دول بس انت نقّى واختار، وكله فى الآخر يا بصارة يا طعمية.  
_الدلو:
البرج المحظوظ داخل برجك النهاردة، وهتكون من أفضل الأبراج.. شخشخ جيوبك وطلّع الحلاوة بقى.
_الحوت:
ما تعشمش نفسك باللى يطمعك، وخلى بالك من القرشين اللى حيلتك لا يكون طمعان فيهم.