بالفيديو.. «سحر» عاملة نظافة بآداب عين شمس: خدت محو أمية واشتغلت عشان أساعد جوزي في تربية الأولاد.. مرتبي 700 جنيه وبندفع دروس خصوصية 1200 جنيه.. ونفسي بنتي تطلع دكتورة عشان ما تشوفش اللي شو
"سحر عبد الله" عاملة النظافة بكلية الآداب جامعة عين شمس، حصلت على شهادة محو الأمية لتؤهلها للعمل بالكلية، حتى يتسنى لها مساعدة زوجها في تربية أبنائهما، وإدخالهم أعلى الكليات.
قالت "سحر" إنها كانت تعمل في مصنع ملابس منذ أن تزوجت، مضيفة: "ودلوقتي بشتغل عاملة نظافة في كلية الآداب بجامعة عين شمس، وبودي الورق من المكاتب لبعضيها، وبنظف الحمامات والمكاتب، وبقالي 6 سنين بشتغل في الكلية".
محو الأمية
وأوضحت "سحر" أنها تركت مصنع الملابس لأن العمل كان يتطلب التأخير، مضيفة: "وكده طبعا مبلحقش أجهز أكل لعيالي أو أقعد معاهم، فأخدت شهادة محو الأمية واشتغلت من ساعتها بكلية الآداب كعاملة نظافة، بس مستنية التعيين عشان أتثبت، بس المشكلة إننا ملناش تأمين صحي".
وأضافت: "أنا عدى عليا عمداء كتير، زي الدكتور ممدوح الدماطي وزير الآثار الحالي، ودلوقتي الدكتور عبد الرازق بركات العميد الحالى".
تعليم أولادها
وأكدت "سحر" أنها حرصت على إلحاق ابنتها بالثانوية العامة وهي الآن في الصف الثالث الثانوي، متمنية أن تحصل على مجموع عالٍ، وتلتحق بأعلى الكليات، مضيفة: "بقول لولادي وبنتي بالأخص: ذاكري عشان متشوفيش اللي أنا بشوفه، عايزاكي تبقى معاكي كلية عشان تبقي أحسن مني وتبقي دكتورة عشان متخدميش الناس زيي".
وأشارت إلى أن مرتبها 700 جنيه، وتتعاون هي وزوجها لدفع مصاريف الدروس الخصوصية الخاصة لابنتها بالثانوية العامة، مضيفة: "إحنا بندفع 1200 جنيه شهريا في الدروس".
الشغل مش عيب
واختتمت حديثها: "أنا مبستعرش من شغلي وبنتي متتكسفش إني عاملة، دي لو كانت أمي كده أشيل جذمتها، وعيالي عارفين إن الشغل مش عيب ويتباهوا إننا شغالين كده وتعبانين عشانهم، أتمنى لبنتي يجيلها ابن الحلال، وابني آدم يكبر ويدخل المدرسة".
