أنقذوا ابني.. استغاثة مؤثرة من أم بالحرانية عبر «فيتو»: مش عارفة أنزل الشارع من خوفي على أولادي

في استغاثة إنسانية مؤثرة، روت سيدة من منطقة الحرانية بمحافظة الجيزة، في تصريحات خاصة لـ«فيتو»، تفاصيل معاناتها جراء خلافات ومشاجرات متكررة مع شابين من أبناء المنطقة، مؤكدة أن تلك الخلافات امتدت لتطال أبناءها، وأن نجلها كريم تعرض لاعتداءات متكررة أسفرت عن إصابته بأضرار جسدية ونفسية، مطالبة المسؤولين بالتدخل لحماية أسرتها ووضع حد لمعاناتها.

وقالت الأم، في تصريحاتها لـ«فيتو»: «أنا تعبت من الناس دي، حاولت أحل الموضوع بالود، وبعت أهالي من البلد يتدخلوا علشان ينهوا الخلافات، لكن مفيش فايدة، ولما لقيت إن الموضوع مستمر وخفت على ولادي، لجأت للقضاء وحررت محاضر، لكن رغم الأحكام اللي صدرت، لسه المعاناة مستمرة».

وأضافت: «ابني حسنين طالب في الفرقة الرابعة بكلية الحقوق، وتلات سنين قبلها كان امتياز، ومستقبله كان قدامه، لكنه اتعرض للحبس لمدة سنتين و3 شهور بعدما راح يدافع عن أخوه كريم، بعد ما جاله تليفون بيبلغه إن أخوه اتعرض للاعتداء، وراح علشان يلحقه، واتصورت الواقعة بكاميرات المراقبة».

وتابعت الأم: «كريم ابني حالته الصحية والنفسية بقت صعبة، وعنده كسر في العمود الفقري، ومعايا تقارير طبية وتحاليل من مستشفى قصر العيني تثبت حالته، وبقى مش قادر يتحرك بشكل طبيعي، وبيحتاج متابعة وعلاج، وأنا قلبي بيتقطع عليه وهو رافض ياخد علاجه من كتر اللي شافه».

الأم تروي تفاصيل واقعة الاعتداء الأخيرة

وعن واقعة الاعتداء الأخيرة، قالت: «يوم 10 أكتوبر كنت رايحة أعمل منظار لابني في قصر العيني، وفوجئت بمحمد وائل بيعتدي عليا بالمطواة في شارع الهرم، والناس تدخلت وشالتني أنا وابني وودونا قسم الهرم، وحررت محضر بالواقعة، ومعايا تقرير طبي يثبت اللي حصل».

واستكملت الأم حديثها لـ«فيتو» بصوت يملؤه الحزن: «أنا بقيت بخاف أنزل الشارع، وبنتي السنة اللي فاتت ما راحتش الجامعة خوفًا من إن يحصل لها حاجة، وابني مش عارفة أوديه للدكتور من خوفي عليه، إحنا أسرة حياتها اتدمرت، وكل يوم عايشين في رعب».

استغاثة للرئيس ووزير الداخلية لحماية الأسرة

واختتمت السيدة استغاثتها قائلة: «أنا بناشد الرئيس عبد الفتاح السيسي، ووزير الداخلية، وكل مسؤول يقدر يقف جنبي، أنا مش عايزة غير حقي، عايزة أنزل من بيتي وأرجع بأمان، حطوا كريم مكان ابنكم، وحسوا بوجع أم بقالها 21 سنة بتربي في ابنها، ارحموني وارحموا ولادي، أنا مش عارفة أروح لمين ولا أعمل إيه، ونفسي صوتي يوصل للمسؤولين».