منيع: تعرضت لظلم كبير وهدفي رفع علم مصر في بطولات المصارعة الدولية
المصارعة، فجر عبد اللطيف منيع لاعب المنتخب الوطني للمصارعة، مفاجأة بعد ساعات من ختام مشاركته في منافسات بطولة العالم للكبار، المقامة حاليا في كازاخستان.
وقال منيع: “أنا حاليًا اتعرضت لظلم كبير، ولكن الحمد لله، عندي إيمان إن كل حاجة بتتغير مع الصبر، وإن الحق مهما طال الوقت لازم يرجع لأصحابه”.
وأوضح اللاعب: “أنا حققت إنجازات كبيرة في المصارعة، وشاركت في أكبر البطولات العالمية والأولمبية، ورفعت اسم مصر في المحافل الدولية، وكل اللي بتمناه إني أكمل مشواري الرياضي وأحقق الميدالية الأولمبية اللي بحلم بيها”.
وأردف بطل العالم في المصارعة: “أنا مش بطلب من أي جهة دعمًا ماليًا أو أي امتيازات خاصة، كل اللي بطلبه هو فرصة عادلة للتدريب والمنافسة، وتوفير خطة إعداد قوية ومستقرة، تشمل معسكرات حقيقية ومنافسات قوية، تساعدني على الاستعداد بالشكل اللي يليق برياضي بيمثل بلده وبيسعى لتحقيق إنجاز أولمبي لمصر”.
وأكمل منيع: “من أصعب الحاجات على أي لاعب إنه يكون عنده القدرة والطموح إنه يحقق إنجازات أكبر، لكنه يلاقي نفسه بعيد عن الأجواء المناسبة للتدريب والمنافسة. والأصعب من كده إن ده يحصل وهو نفسه يرفع اسم بلده ويحقق لها ميدالية أولمبية”.
وتابع: “ورغم كل الظروف، هيفضل عندي الأمل والإصرار إني أكمل طريقي، لأن عمري ما هنسى فضل بلدي عليّ، ولا هتخلى عن حلمي في إني أحقق إنجاز يفضل في تاريخ الرياضة المصرية”.
وأضاف منيع خلال تصريحاته: “بشكر كل الناس اللي وقفت جنبي ودعمتني، وبشكر كل الجهات والأشخاص اللي ساهموا في مساندتي خلال مشواري الرياضي، وأتمنى إن الفترة الجاية تكون أفضل، وإن يكون فيه اهتمام حقيقي بتوفير الدعم الفني والمعسكرات المناسبة، علشان أقدر أرجع للتدريب بقوة وأنافس على أعلى مستوى”.
واختتم اللاعب تصريحاته قائلا: “كل أملي إن الفرصة العادلة تكون موجودة، وإن مجهود السنين ما يضيعش، وإن حلم الميدالية الأولمبية يفضل ممكن، بإذن الله، هدفي في النهاية مش مصلحة شخصية، هدفي إني أرفع علم مصر، وأسمع اسم بلدي في منصات التتويج، وأحقق إنجاز يفرّح كل المصريين”.
