إلهام شاهين عن أزمة الجونة: ناس سخيفة صورت فستاني وبكره السوشيال ميديا (فيديو)
علقت الفنانة إلهام شاهين عن أزمة فستانها فى مدينة الجونة، قائلة: "أنا بكره السوشيال ميديا جدًا وبحس إنها بقت وسيلة للتطاول وللناس إللي معندهاش شغلة ولا مشغلة غير إنها تهاجم المشاهير وتنتقد كل حاجة بيعملوها، ومن المواقف إللي ضايقتني جدا لما كنت في مهرجان الجونة وكان فيه هوا شديد وفستاني طار غصب عني ولقيت ناس سخيفة جدا مصورة اللحظة دي ومنزلاها وقاعدين يتريقوا".
وتساءلت الفنانة إلهام شاهين خلال لقائها ببرنامج "بين السطور"، تقديم الإعلامية يمنى بدراوي، المذاع على فضائية "TEN": "يعني إيه المتعة في إنك تصور حد في لحظة هو مش واخد باله فيها أو حصلت له حاجة خارجة عن إرادته وتقعد تشهر بيه وتتريق عليه؟"، مؤكدة: "السوشيال ميديا خلت الناس تقتحم خصوصيات بعض بشكل مرعب ومبقاش فيه احترام لأي حد، وأنا مبتابعش التعليقات ولا بهتم باللي بيتقال لأني عارفة قيمتي كويس وعارفة أنا بقدم إيه لكن اللي بيحز في نفسي هو تدني المستوى الأخلاقي لبعض مستخدمي المواقع دي اللي بقوا بيستنوا أي غلطة أو أي موقف عشان ينهشوا في عرض الناس وتاريخهم".
واضافت الفنانة إلهام شاهين: "أنا إنسانة صريحة وبقول اللي في قلبي وما بخفش من حد واللي مش عاجبه كلامي هو حر لكن ما يغلطش ولا يتجاوز لأن الاحترام ده أساس كل حاجة وفي النهاية السوشيال ميديا دي عالم افتراضي ومزيف وأنا بفضل أعيش في الواقع ومع الناس اللي بتحبني بجد وبتحترم فني وتاريخي وبقول لكل الناس السخيفة دي بطلوا تطفل وبطلوا تدوروا على عيوب غيركم وصلحوا من نفسكم الأول قبل ما تنتقدوا الناس وتجرحوا في مشاعرهم".
وختمت الفنانة إلهام شاهين، حديثها، قائلة: "الفن رسالة والجمهور الحقيقي هو اللي بيقدر التعب والمجهود مش اللي بيدور على فستان طار أو كلمة اتقالت بعفوية".
