ناهد السباعي: غصب عني بروح لأطباء نفسيين وحاليا بتعالج بالقرآن (فيديو)
قالت الفنانة ناهد السباعي: "زرت طبيب نفسي بعد وفاة والدي وأخويا اللي توفوا في نفس الوقت، وكنت وقتها بشتغل وعندي شغل نازل في شهر رمضان فكان لازم مع شغلي أبقى بتابع مع دكتور".
عائلة ناهد السباعي واللجوء للأطباء النفسيين
وتابعت خلال الجزء الثاني من لقائها ببرنامج “VIP” الذي تقدمه الإعلامية أميرة بدر بقناة "هي": "أنا لما بقرب من أهلي وأقاربي جدًّا وبروح لأهلي المنتقبات والمتدينات بحس إني برتاح وأكون كويسة، ولكن فيه ساعات بيبقى لازم تدخل طبي وأنا كان صعب عليَّ وفاة أبويا وأخويا علشان كدا كان غصبي عني إني أروح لدكاترة نفسيين كتير".
علاج ناهد السباعي بالقرآن
ولفتت: "أنا بكره الأدوية ومش بحبها، وأنا حاليًّا بحب أمشي على اللايف كوتش والحاجات اللي بتعالج بالمياه اللي مقروء عليها قرآن وأنا بؤمن بالعلاج الديني دا، لكن حالتي بعد وفاة والدي وأخويا كانت تستدعي إني آخد أدوية لإني كان عندي اكتئاب شديد".
في الجزء الأول من نفس اللقاء، قالت الفنانة ناهد السباعي: "أنا مؤمنة بالحسد جدًّا، لكن ما حدش يقدر يضر حد إلا بإذن ربنا ولو الناس بتحاول بيكون عندها شوية عادات دينية الصبح وبالليل مش هيحصل حاجة".
بروتوكول ناهد السباعي الديني
وتابعت خلال لقائها ببرنامج "في آي بي" الذي تقدمه الإعلامية أميرة بدر بقناة "هي": "أنا دايمًا حريصة على أذكار الصباح والمساء وقراءة آية الكرسي وخواتيم سورة البقرة والمعوذتين وسورة الإخلاص".
التزام ناهد السباعي الديني
وأضافت: "أنا بصلي ودايمًا بكلم ربنا بأسلوبي والأحسن إننا نقرب لربنا بطريقتنا وبلغتنا وبطريقة الخشوع بتاعتنا أحسن من دعاء احنا مش فاهمينه، وطلبت من ربنا حاجات كتير إني نفسي أمثل وأنجح وأعمل أفلام مهمة تعيش وإن أهلي يبقوا فخورين بيَّ ويحفظ لي أهلي ويرحم أمواتنا".
تواصل ناهد السباعي مع الأموات
ولفتت: "أنا بتواصل مع الأموات وأخويا ووالدي المتوفين بيجوا لي وبيتكلموا معايا وبيحاولوا يتواصلوا معايا، وساعات بيبقى بيتعرض لي فيلم وأخويا الله يرحمه كان بيحب شغلي وبيشجعني وفخور بيَّ ممكن وقتها أحس إنه مبسوط وفرحان وحواليَّ وبيشوف الفيلم وأحلم به، والموضوع دا ما لهوش علاقة بالدجل والشعوذة، دي حاجة روحانية لكل اللي بيقربوا من ربنا".
التزام ناهد السباعي
وأشارت ناهد السباعي: "أنا من الناس اللي ساعات ربنا بيوجهها ويخليها تعمل حاجات معينة وتمشي في طريق معين وبهذا يبقى ربنا بيكملنا، وأنا بني آدمة طبيعية وملتزمة".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم، أسعار الدولار، أسعار اليورو، أسعار العملات، أخبار الرياضة، أخبار مصر، أخبار الاقتصاد، أخبار المحافظات، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي، الدوري الإيطالي، الدوري المصري، دوري أبطال أوروبا، دوري أبطال أفريقيا، دوري أبطال آسيا، والأحداث الهامة والسياسة الخارجية والداخلية، بالإضافة للنقل الحصري لـ أخبار الفن والعديد من الأنشطة الثقافية والأدبية.
