عبد الباسط حمودة: أقسم بالله هعلم حمو بيكا الغنا في شهر | فيديو
قال المطرب الشعبي عبد الباسط حمودة: "أنا بحب حمو بيكا علشان هو إنسان طيب بس هو يديني ودنه ونفسه شهر وأنا هخليه يعرف يغني ويبقى كويس جدًّا ويعرف هو بيقول إيه".
دعم حمو بيكا
وتابع خلال مداخلة هاتفية ببرنامج "مصر جديدة" المذاع على قناة "إي تي سي": "هعلم حمو بيكا من قلبي وهعرفه إزاي يغني ويجيب طبقته وعلشان هو إنسان عنده طموح وعايز ياكل عيش احنا لازم ناخد بإيده".
تلامذة عبد الباسط حمودة
ولفت: "أحمد شيبة واخد مني وطارق الشيخ ومحمود الليثي ودنيا سمير غانم ونيكول سابا كلهم واخدين مني".
تعليم حمو بيكا الغناء
وتابع: "أقسم بالله هعلم حمو بيكا الغنا وهخليه مطرب في شهر وكأنه بيغني بقاله 30 سنة وهعلمه المقامات بس هو يديني ودنه بس هو بعيد، أنا لما بتصل بيه بلاقي تليفونه مقفول، هو ناقصه علم النغم".
ونشر مؤدي المهرجانات حمو بيكا، مقطع فيديو جديد له مع المدرب الموسيقي محمد عبد الستار أثناء تدريبه استعدادًا لاختبارات نقابة المهن الموسيقية.
ونشر حمو بيكا مقطع فيديو خلال التدريبات مع المدرب الموسيقي محمد عبد الستار، عبر صفحته الرسمية بموقع التواصل الاجتماعي "فيس بوك" معلقًا: "أثناء تدريبي مع الدكتور محمد عبد الستار يا مسهل تدريبات لاختبارات النقابة ادعو لي".
وفي السياق ذاته كان بيكا قد وجَّه رسالة لنقيب المهن الموسيقية والفنان هاني شاكر، متمنيًا الرجوع لغناء المهرجانات الشعبية مرة أخرى، وقال: "أنا نفسي أشتغل يغيَّروا اسمي بقى ولا يعملوا اللي عايزينه براحتهم، أنا فيه ناس فاتحة بيوت من ورا مني، أنا لو لوحدي مش هيفرق معايا إنما أنا اللي يهمني الناس اللي معايا".
وتابع بيكا خلال مداخلة هاتفية في برنامج كلام الناس، مع الإعلامية ياسمين عز، عبر شاشة MBC مصر: "أنا فاتح 3 مطاعم وكافيه ومشغل ناس تاني برضه، وأنا مصدر رزق للناس دي، والمطاعم ماكسبتش منها حاجة وبطلع المرتب من جيبي للموظفين".
وأعرب حمو بيكا عن حزنه، واستيائه من حصول زملائه من مطربي المهرجانات على كارنيهات باستثنائه حسب ما وصف؛ إذ قال: "كل مطربين المهرجانات الشعبية أخدوا تصريح من نقابة المهن الموسيقية وكارنيه، ومفيش غيري ممنوع من الغناء لحد دلوقتي، وكان المفروض الامتحان بتاعي مع نقابة المهن الموسيقية اللجنة اللي فاتت، وروحت ورفضوا يدخلوني عشان أمتحن".
