أطرف مواقف المواصلات.. أحمد: «تصليح تكييف القطر بجردل».. إسلام: «الشهامة طيرت الكرسي».. محمد: «دفعت للميكروباص كله بسبب غلطة لسان».. أكرم: «السواق بص لي باحتقار بسبب

يستقل غالبية المواطنين يوميا وسائل المواصلات التي أصبحت جزءا لا يتجزأ من حياتهم ولا يمر يوم إلا ويحدث موقف طريف في وسائل المواصلات خاصة مع الزحام في الشوارع وداخل وسيلة المواصلات نفسها.

واستعرض مرتادو صفحة "الكومنت الجاحد" عبر موقع "فيس بوك" عددا من المواقف التي حدثت معهم في وسائل المواصلات:

وردا على سؤال "احكيلنا موقف حصلك في المواصلات؟"، رد متابعو الصفحة كالتالي:

التكييف والجردل
قال أحمد: "احنا بقي ركبنا القطار والتكييف بينقط مية على الكرسي لما جه الكمسرى اشتكينا من المية قام رفع التليفون وقال في حزم (أيوه يا محمد ابتعلي فني التكييف حالا)، جه فني التكييف ومعاه جردل ادهونى وقالى كل ما يتملى الجردل رن عليا وأنا هاجي لحضرتك افضيه".

فيلم أكشن
وأضافت خلود: "مرة كنت راكبة القطار وحصلت خناقة جامدة في الكرسي اللي قدامي وضربوا بعض الرجالة وكانت بهدلة وناس كتير قامت من كراسيها خايفين وأنا بكل تلقائية طلعت كيس شيبسي وقعدت أكل واتفرج على الخناقة جه الكمسري يحوش لاقاني قاعده باكل قالي أتمنى الرحلة تكون عجبت حضرتك وآسفين على الإزعاج، شكلي كنت ناسية إنها حقيقة وإنه مش فيلم أكشن بشوفه".

"آخر جنيه ونص"
وقال محمد: "مرة كنت مسافر القاهرة وبعد ما قضيت مصلحتي روحت محطة القطر جيت أقطع التذكرة لقيت مش معايا فلوس أو بمعنى أصح وقعت مني وملقتش في جيبي غير جنيه ونص كلمت الكمسري رد عليا التذاكر معدودة عليا وفضلت قاعد في المحطة أكثر من 6 ساعات إن ألاقي حد أعرفه على حظي مفيش وألاقي واحد جاي يوشوشني ويقولي أخوك مزنوق في تكملة حق التذكرة بقولوا كام قالي جنيه ونص قولتله خد هما اللي معايا قسمًا بالله مفيش خمس دقايق ولقيت الكمسري بينده عليا طلعت أجري بقولوا نعم قالي خد يابني التذكرة أهي وألحق القطر بتاعكوا بيسحب من على الرصيف اخذت التذكرة وركبت القطر وطول منا راكب مفيش على لساني غير سبحان الله".

غلطة لسان
وأضاف أحمد: "راكب ميكروباص وواحد قاعد جنبي عمال كل شويه يحط إيده في جيبه ويطلع لب فببص ليه فجأة لاقيته مطبق ايده بيقولي اتفضل بقوله شكرًا مش بحب اللب لاقيته بيقولي لب إيه يا باشا خد الأجرة واحد من الخمسة".

وقال محمد: "كنت مرة راكب ميكروباص وراكب في الكرسي الأولاني ومعايا 200 جنيه مجمدة ومعييش فكه فقولت ادفع للسواق الأجرة وألم أنا من الركاب وآخد الباقي من أجرة الركاب فقلتله خد يسطا العربية كلها من الـ200 جنيه لقيت الناس اللي جمبي اللي بيقولي لا يبني استني والله مينفع أنا احرجت وقولتلهم خلاص يا جماعة ولقيت الناس اللي ورايا بيقولوا ربنا يكرمك يبني كتر خيرك واللي بعديهم تشكر يبني من الإحراج قولتلهم على إيه يا جماعة دي حاجة بسيطة ونزلت من العربية كنت عايز أمرمط وشي في الأسفلت".

الشهامة طيرت المكان
وأضاف إسلام: "كنت رايح لأخويا الكلية أوديله فلوس، المهم رحت أركب الميكروباص لقيتوا ناقص 2 والسواق يطلع المهم جات بنت وأمها المهم قولت للست الكبيرة تعالي يا حجة مكاني ركبت هي ونزلت أنا راحت ركبت بنتها وقفلت الباب وسبيوني ومشيوا".

السواق علم عليا
وقال أكرم: "بقول للسواق بسرعة شوية يا سطا متأخر على الشغل، بص لي بصة استحقار وقالي عشان تبقي تنزل من بيتكم بدري".