ردود أفعال غاضبة من ناشطات "الفيس بوك" ضد رجل يريد الزواج على زوجته..الزوج: أحبها ولكن أرغب بأخرى..والجنس الناعم يرد:خسارة فيك التضحية
الزواج رباط مقدس، يأتى بعدما يغلف كيوبيد القلوب العاشقة فلا يرى كل منهما سوى الآخر، ولا يشعر أي منهما بمخلوق، فالحب أن ترى حبيبك فقط دون غيره لهذا تقدم على خطوة الارتباط الأبدى به.
رصدت "فيتو" ردود أفعال ناشطات صفحة "تنكة هانم" على منشور لرجل يريد الزواج على زوجته، ويخونها رغم أنها وافقت على البقاء معه، والوقوف بجواره، رغم أنه لا ينجب، مما أثار عاصفة من الانتقادات الموجهة إليه.
تقول أمنية سمير،:"عارف لو حسيت بمراتك وبأحاسيسها لما تكون أنت مع واحدة تانية هتعرف يعنى أيه تتجوز عليها، وعارف ليه ربنا أباح الزواج مثني وثلاث ورباع، الإباحة هنا مش مطلقة، لازم يكون فيه ظروف عند مراتك تبيح لك الزواج من الأخري يعني مريضة، أو مبتقومش بواجبات الزوجية".
وتضيف أسماء محمد،:"عيب أوي لما تكون حضرتك إلى مبتخلفش، وهي صبرت وعاشت معاك رغم أن يمكن جواها ألم كبير، لأن إحساس الأمومة حاجة طبيعية، برغم كدا مطلعتش ندلة بالرغم من أن لها الحق ومحدش يلومها لأنه حقها".
كما تقول ياسمين أحمد:" واقفة جنبك وبتحبك وباقية عليك ازاى تغفر لك ذنب خيانتك ليها، وأنت مصمم تتجوز عليها، ليه كدا انت كده بتدمرها، أنت لو تعرف إحساس الست لما جوزها بيتجوز عليها أو يخونها بيكون عامل إزاى، أصعب إحساس ممكن الست تعيشه أنها تحس إنها مش مالية عين جوزها بس، في حالتك دى العيب فيك وفى أنانيتك أنت إنسان مريض".
وتؤكد منى موسى ما ذكر، قائلة:"حل المشكلة دي في انك متلخبط وأنت بتحب مراتك، بس زهقت من الروتين اليومي، طيب خدها وسافر كام يوم تشوفوا بلد جديدة، ومكان جديد هتحس بفرق كبير".
وأردفت لبنى عزب قائلة،:" خسارة سنين عمرها اللى ضيعتها معاك، كان زمانها اتجوزت وخلفت بدل ما اتحرمت من الأطفال عشان واحد ما يستاهلش، فكر كده لو مراتك اتجوزت عليك افتراضيا يبقى شعورك ايه".
