هشام سليمان: اشتغلت مع يوسف شاهين في "المهاجر" بالصدفة وقالي "انت حمار" لهذا السبب

تحدث المنتج هشام سليمان عن كواليس اختيار يوسف شاهين له ليكون مدير الإنتاج لفيلم "المهاجر"، مشيرا إلى أنه لم يكن المرشح الأول، وذلك خلال اللقاء المفتوح الذي يقيمه مهرجان القاهرة السينمائي الدولي ضمن فعاليات الدورة السابعة والأربعين. 

المنتج هشام سليمان 
 

وقال هشام سليمان خلال اللقاء: "كنت موجود في مكتبي.. لقيت يوسف شاهين بيقولي انزل عاين الفيلم لغاية ما نجيب حد للانتاج قولتله ماشي.. قالي عندي الفيلم دا وعايزك تجيبلي جبل وغيط قمح.. قولتله ممكن اقرا السيناريو رد عليا هتقرا المشهد دا بس." 

وتابع: "قمت بالبحث عن الجبال في مصر وعملت قايمة وروحت صورت كل الجبال دي وطبعت الصور دي وجنب كل جبل عنوانه.. وبعدها قالولي الاستاذ يوسف شاهين عايز يقابلك.. لما شوفته عرضت عليه الجبال دي قالي هاتلي اكتر واحد انت حبيته.. حطيت الورق والصور قعد يبص عليهم واختار جبل وقالي صورت دا الساعة كام قولتله معرفش.. قالي عشان حمار.. وشرحلي الصورة وقالي يبقي الصورة دي متاخده الساعة ١٢ الضهر".  

وتابع: "سالني على الصورة اللي بعدها وقالي صورت الجبل دا الساعة كام.. فرفعت عيني قولتله مش عارف صورته الساعة كام قال لا عايزك تعرف قولتله حكيتله اللي حصل وانا بصور وقولتله تقريبا 1 الا تلت.. قالي عايزها بالظبط قولتله معرفش واتحركت". 

وأردف: "اديته ضهري ومشيت نده عليا ومكنتش عايز ابصله.. قالي هشام انت هتعمل معايا الفيلم دا.. سالته ليه اخترتني قالي عشان مكدبش عليا".