أحمد نعينع: السادات لما سمع صوتي، قال "مصطفى إسماعيل صحي تاني"
أحمد نعينع، قال الدكتور أحمد نعينع: "قرأت القرآن الكريم مع الرئيس الراحل أنور السادات في بداية اعتمادي بالإذاعة والتليفزيون".
إعجاب السادات بالقارئ
وأضاف خلال لقائه ببرنامج "صاحبة السعادة" الذي تقدمه الفنانة إسعاد يونس بقناة "دي إم سي": “الرئيس السادات أخدني معاه في السكرتارية الخاصة به بعد لما سمعني في رصيف 9 بالقوات البحرية لما كنت ضابط احتياط خلال فترة التجنيد، وصافحني، وقال: بسم الله ما شاء الله، وبعدين الصيادين جابوني في الإسكندرية والرئيس بيعمل لهم عيد للصيادين، وأخدوني على الاستراحة بتاعته في المعمورة.. وفي المرة الثانية السادات سلم عليا، وكان عثمان أحمد عثمان حاضر فقال له: ”يا أبو عفان ده مصطفى إسماعيل صحي تاني".. وكان وقتها الشيخ مصطفى إسماعيل متوفى من سنة، وأشاد بيا وقال لي: "برافو برافو".
قرار رئيس الجمهورية بشأن نعينع
وتابع: "المرة التالتة اللي سمعني فيها الرئيس السادات، في عيد الطبيب، وبعدها جابني معاه الرئاسة وقال لهم: أنا عايز الدكتور اللي بيقرأ في الإسكندرية القرآن، وقال لي: أنا فخور بيك إني بسمعك، قلت له: وأنا فخور إني بسمع حضرتك، فقال: طيب كدة إنت معانا، وبقيت في السكرتارية الخاصة لرئيس الجمهورية كطبيب، وبعدين صدر قرار رئيس الجمهورية إن أي مكان فيه رئيس الجمهورية، وفيه افتتاح أنا اللي أقرأ القرآن حتى في صلاة الجمعة".
موقف مع السادات في وادي الراحة بجنوب سيناء
ولفت: "السادات كان بيروح وادي الراحة في جنوب سيناء يعتكف في العشر الأواخر من رمضان، وكان الموقف أول يوم قعد على الحصيرة قالوا لي الرئيس بيقول لك اقرأ.. وكان الريح بيقطع الصوت وقتها قال لي ما تقرأ ياللي بتقرأ، وبعدين جاب بطارية وميكروفون، وبقيت أقرأ له كل يوم العصر وكان يحب يسمع مني سورة طه".
استراحة ميت أبو الكوم
وأشار: "كان السادات يروح ميت أبو الكوم، ويقعد هناك شهر ديسمبر فترة عيد ميلاده ويقعد في الجامع ونصلي ونقرأ قرآن في الجامع، ويقعد معاه الشيخ اللي كان بيحفظه القراَن وهو صغير، ويقعد وسط الفلاحين بالجلابية ويتمشى في الأرض بتاعته".
موقف طريف بين السادات وأنيس منصور
ولفت: "كان السادات يشرب شاي كتير وكان أنيس منصور بيحضر معاه وبيتكلموا معاه في أمور السياسة، وأنا مكنتش بتدخل في القصة دي، كان أنيس منصور يقول معدتي انسبغت، والسادات كل لما يجيله شاي يقوله اشرب يا أنيس ده قرار جمهوري".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار، أسعار اليورو، أسعار العملات، أخبار الرياضة ، أخبار مصر، أخبار الاقتصاد، أخبار المحافظات، أخبار السياسة، أخبار الحوادث، ويقوم فريقنا بمتابعة حصرية لجميع الدوريات العالمية مثل الدوري الإنجليزي، الدوري الإيطالي، الدوري المصري، دوري أبطال أوروبا، دوري أبطال أفريقيا، دوري أبطال آسيا، والأحداث الهامة والسياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية.
