ساخرون.. غراب البين يكتب: حلة المحشى بألف جنيه!
بعد يوم طويل من اللف والدوران والمرازية فى خلق الله.. قررت أريح جتتى ساعتين.. جلست فوق بلكونة الست أم هناء وقبل أن أغمض عينى سمعت صوت يأتى من خلف شيش البلكونة لأبو هناء غاضبا، ويقول: أنت عايزة تخربى بيتى يا وليه؟! بتصرفى ألف جنيه واحنا لسه في نص الشهر؟!وديتى الفلوس فين؟!
فردت عليه أم هناء قائلة: والله ما عملت حاجة غير يا دوب حلة المحشى اللى أنت أكلتها دى.. أبو هناء بصوت أعلى: يعنى حلة محشى بألف جنيه؟! فقالت له فى هدوء: بنتك هناء كلمتنى امبارح، وقالتلى إن جوزها بيقولها والله وحشنى المحشى والبط بتاع أم هناء..
فقلتلها طب تعالوا بكرة وأنا أأكلكم محشى وبط.. نزلت السوق يا دوب اشتريت بطاية بـ 600 جنيه وطبعا البطة مش هتكفينا كلنا.. فاشتريت معاها فرخة بـ 250 جنيه علشان عيالنا وعيال بنتك ياكلوا.. واشتريت كيلو بصل و2 كيلو طماطم وكرنباية وشوية خُضرة..
والله ما عملت حاجة غير كدا، واتفاجأت إنى صرفت الألف جنيه اللى كانت معايا، وهنا أدركت أن الليلة دى مافيهاش نوم فوقفت على قدمى وأخذت أنعق بأعلى صوتى “قاق قاق” فراحت أم هناء تهشنى وتقول لى: غور من هنا يا غراب البين جبتلنا النكد والفقر.. فهربت مسرعا ولسان حالى يقول: بقا أنا اللى جبتلكم النكد والفقر ولا تصرفاتكم الغلط هى اللى منكدة عليكم عيشتكم؟!
يعنى إيه تصرفى ألف جنيه على حلة محشى فى الأيام الضنك دى، وأنت عارفة أن راتب زوجك يا دوب بيكفيكم بطلوع الروح؟ وثانيا المفروض ماحدش يعزم حد في الغلاء اللى أنتم فيه ده.. واللى عايز ياكل بط ياكله فى بيته حسب ظروفه وبلاش دلع!
