رئيس التحرير
عصام كامل
Advertisements
Advertisements
Advertisements

غراب البين يكتب: الصناعة هى الحل

غراب البين، فيتو
غراب البين، فيتو

 

بعد يوم طويل من اللف والدوران والمرازيه فى خلق الله وقفت على فرع الشجرة بأحد الشوارع المزدحمة بمدينة المنصورة علشان اريح جتتى حبتين قبل طلوع النهار.. فانكمشت بين اجنحتى وقبل ان أغمض عيناى سمعت حوارا قادما من المقهى أسفل الشجرة
 

أحدهم يقول للآخر: ياعم سعر الدولار ذاد وبقا بـ 25 جنيه وانت لسه نايم فى العسل ومش فاهم حاجه

فرد عليه الثانى: ياحبيبى انت اللى مش فاهم حاجه.. الدولار لا بينقص ولا بيزيد ولا له علاقة بالجنيه أصلا ولا يعرفه من الاساس.. الجنيه بتاعنا هو اللى بينخفض

أما ثالثهم فقال: علشان اقولكم اننا هنشحت وانتم مش بتصدقوا كلامى.. احنا رايحين فى داهية وخصوصا ان ثلاثتنا لا شغله ولا مشغله
 

وهنا لم أستطع سماع بقية الحوار الممل والمكرر فى أكثر من مكان فوقفت على قدمى ونفشت ريشى وأخذت أنعق بأعلى صوتى "قاق قاق" فراح ثلاثتهم يهشوننى ويقولون لى غور من هنا يا غراب البين جبتلنا النكد والفقر.. فقلت يا فكيك وهربت مسرعا قبل أن يحدفوننى بالطوب كعادتهم ولسان حالى يقول: بقا أنا اللى جبتلكم النكد والفقر يا شوية بنى آدمين مش عارفين هما عايزين إيه ويادوب بيتسكعوا على المقاهى ليل ونهار!
 

علشان قيمة الجنيه ترجع لسابق عهدها لازم تشتغلوا وبلاش تسهروا للصبح بالمقاهى ولازم تتعلموا التصنيع.. فبدون الصناعة هيفضل الجنيه فى النازل وهتفضلوا تعانوا من غلاء الاسعار طول حياتكم.. الدولة حاليا تتجه للصناعة.. روح اتعلملك حرفه تنفعك انت وهو وساعتها مافيش حاجه هتغلى عليك.. جاتها ستين ألف نيله اللى عايزه تخلف بنى آدمين زيكم مش عارفين هما عايزين إيه!

Advertisements
الجريدة الرسمية