بسمة: اتهنت بسبب جدي اليهودي.. وهذا ما قصدته من تصريح "أنا مش بقرة علشان أرضع بنتي"
قالت الفنانة بسمة إن الأمومة غيرت العديد من آرائها، ومنها رأيها في الرضاعة الطبيعية، متابعة: "من فترة كنت ضيفة في برنامج واتكلمنا عن الأمومة وفكرة الرضاعة الطبيعية، وواجهت حملة تنمر شعواء على السوشيال ميديا لأن كلامي اتحرف".
وأضافت فى تصريحات تليفزيونية: "قبل الولادة كنت مش عايزة آخد بالي من ابني أو بنتي ومش عايزة أرضع لأني مش بقرة، وانتهى بي الأمر إني رضعت بنتي سنتين، لكن خدوا جزء من كلامي هو أنا مش بقرة، وبقيت تريند يومين بالشتيمة، مع إن البقرة حاجة كويسة".
وردا على سؤال ماذا غيرت الأمومة في شخصيتك؟ قالت: "كل شيء، قبل الخلفة كنت شايفة الطبخ شيء ممل، وبعد ما خلفت وبنتي بدأت تستطعم الأكل بدأت أنفسن لو عجبها أكل حد غيري، واكتشفت متعة في الطبخ".
وأوضحت أنها متفاعلة جدا في جروب الأمهات، وكذلك طليقها عمرو حمزاوي، الذي شجع العديد من الآباء على الانضمام للجروب، فتحول إلى جروب الأهالي.
وأكدت أنها تعرضت لتنمر شديد بسبب أصول جدها اليهودية، مضيفة: "كنت شايفة إنه عادي يكون في العيلة الأديان الثلاثة السماوية، لكن لما بدأت احتك بالمجتمع في المدرسة والجامعة والشغل تعرضت لتنمر فظيع لإن جدي كان يهودي الديانة، وإحدى الصحفيات كتبت عني إذا بليتم فاستتروا".
وأكملت: "هذا التنمر بيخليني طول الوقت أسأل إحنا فين من مصر زمان، اللي كانت متقبلة ومحتضنة جميع الأديان، وعيلتي كانت مثال على عناوين الأفلام القديمة الأبيض وأسود، زي حسن ومرقص وكوهين".
