غراب البين يكتب: "الجوازة دى مش لازم تتم"
بعد يوم طويل من اللف والدوران قررت الوقوف على بلكونة الست إمتنان أم البنت اللى اسمها بسنت.. إنكمشت بين ريشى وقبل أن أروح فى النوم سمعت بسنت وهى تحاول إقناع خطيبها بالتوقيع على قائمة المنقولات الزوجية والولد المسكين خايف من غضب أبوه اللى مش موافق على القايمة وغير مقتنع بها من الأساس
أبو بسنت دخل عليهم وهدد العريس بأنه لا زواج بدون قايمة.. والعريس بيطالب بكتابة ما قامت العروسة بشرائه وليس كتابة كل العفش.. فتدخلت الست إمتنان وقالت للعريس يا إبنى دا احنا كمان هنكتب الشبكة والمؤخر فى القايمة واعتبره وصل أمانه وكدا كدا انتم مش هتسيبوا بعض لأنك شارينا واحنا شارينك وكارمينك خالص.. دى بنت خالتها اتكتبلها قايمه بـ2 مليون جنيه وبنت عمها كتبت فى القايمة العربية اللى وعدها زوجها إنه هيشتريهالها بعد 6 سنوات إن شاء الله.. إنت بس إمضى عالقايمة ومش لازم أبوك يعرف!
وهنا لم أستطع إكمال الحوار ووقفت على قدمى ونفشت ريشى وأخذت أنعق بأعلى صوتى "قاق قاق" فراح أبو بسنت وبسنت والست إمتنان يفتحون البلكونه ليهشوننى وهم يقولون غور من هنا يا غراب البين جبتلنا النكد والفقر
فقلت يا فكيك وذهبت هاربا قبل أن يحدفوننى بطفاية السجاير ولسان حالى يقول: بقا أنا اللى جبتلكم النكد والفقر يا شوية بنى آدمين أم أنكم من تنكدون على بعضكم البعض؟!
قايمة إيه اللى بتكتبوا فيها المؤخر واللى اشتريتوه واللى اشتراه العريس واللى لسه بتفكروا تشتروه ومش ناويين تشتروه أصلا لكنه لازم يتكتب فى القايمة
دا مش جواز ولا بداية لعشرة طيبه.. دا يادوب نسميه بيع وشراء ووصل أمانة بنية حبس الزوج المغلوب على أمره فى أقرب فرصة.. ياخى جاتها ستين ألف نيلة اللى عايزه تخلف بنى آدمين زيكم.. دا أنا كغراب محترم شايف إن "الجوازه" دى مش لازم تتم أبدا وعلى الإطلاق لأنها حتما ولا بد ستنتهى بالطلاق!
