جمال شعبان عن انتقاد ميدو للأطباء: استهدى بالله يا كابتن.. الدكاترة طفشوا وسابوا البلد
ردَّ الدكتور جمال شعبان، مدير معهد القلب السابق، على اتهام أحمد حسام ميدو لاعب منتخب مصر ونادي الزمالك السابق، بفشل المنظومة الطبية بسبب رفض بعض المستشفيات استقبال والد زوجته لعدم وجود أطباء بسبب إجازة العيد.
وكتب مدير معهد القلب السابق، على صفحته الشخصية بموقع التواصل الاجتماعي "فيس بوك" قائلًا: اهدأ واستهدى بالله يا كابتن ميدو.. المهم طمنا على صحة حماك يا رب يكون تم إنقاذه".
وأضاف الدكتور جمال شعبان: "آفة حارتنا التعميم والتسرع في إطلاق الأحكام.. الدكاترة طفشوا وسابوا البلد يا بو الكباتن ينفع تطلع بعد فشل المنتخب تقول اللاعبين معظمهم ما عندهمش ضمير ولا بتدرس أسباب الفشل وتستعين بمدير فني جديد؟!".
ميدو ينتقد القطاع الطبي
وكان أحمد حسام ميدو، لاعب منتخب مصر ونادي الزمالك السابق، أثار حالة من الجدل خلال الساعات الماضية، بعدما انتقد القطاع الطبي في مصر بسبب رفض بعض المستشفيات استقبال والد زوجته لعدم وجود أطباء بسبب إجازة العيد.
ووصف أحمد حسام ميدو الواقعة خلال بث مباشر عبر حسابه على موقع "إنستجرام"، بـ"المهزلة"، مؤكدًا أنه خلال قضاء عطلة في الساحل الشمالي تعرَّض والد زوجته لوعكة صحية، وذهب إليه في القاهرة لنقله إلى المستشفى، لكنه تفاجأ أن المستشفيات ترفض استقباله ولا يوجد أطباء.
وقال ميدو: "تخيلوا إن القطاع الطبي في مصر معظم الدكاترة بيوصوا الدكاترة الصغيرين ما يبعتوش شغل في العيد عشان هما في إجازة، دا اسمه كلام؟ يبقى ما يستحقوش يلبسوا البالطو الأبيض، تخيلوا إن الناس ممكن تموت عشان الدكاترة في إجازة".
وأضاف: "خلوا بالكم أنكم بتتكلموا عن شخص الحمد لله ميسور الحال ميسور ويقدر يدخل مستشفى خاص، تخيلوا بقى الغلابة، الدكاترة اللي بيروحوا إجازات ماشي أنت من حقك تاخد إجازة، بس إزاي مفيش سيستم إن يبقى لازم في دكاترة في كل تخصص موجودين للطوارئ".
واستنكر ميدو الأمر: "هي الناس ما بتتعبش في الإجازات، الناس ممكن تموت في أي وقت، القطاع الطبي في مصر مهزلة وبكلمكم على مستشفيات كبيرة، أنا بقولكو على مسؤوليتي ومن خلال تجربة شخصية القطاع الطبي في مصر فاشل والدكاترة معظمهم معندهمش ضمير".
