أصبت بالشلل من كتر الزعل.. ليلى غفران تكشف سبب ابتعادها عن الساحة الفنية | فيديو
قالت الفنانة ليلى غفران: "غيابي عن الوسط الفني والغناء بسبب ظروف صعبة إلى جانب تغيُّر الوسط، وأصبح غريبًا عليَّ".
إصابة ليلى غفران بجلطة
وأضافت خلال لقائها ببرنامج "كلام الناس" المذاع على قناة "إم بي سي مصر": "أصبت بجلطة في المخ تسببت في تعرضي لشلل كامل، وعانيت كثيرًا من الناحية الصحية، ودخلت في غيبوبة".
دخول ليلى غفران في غيبوبة
وتابعت: "لما فوقت من الغيبوبة حسيت إن ربنا بيقولي قومي بقى وكملي المسيرة بتاعتك، والحمد لله قمت وابتديت أشتغل وأعمل حاجات".
آثار الإصابة بجلطة المخ
ولفتت:" جلطة المخ اللي اتعرضت لها جت من تراكمات كتير جوايا، وأنا من النوع اللي مبيعرفش أغضب ولا أطلع اللى جوايا وأسامح، ونمت زعلانة، ومن كتر الزعل صحيت جالي جلطة، ودخلت في غيبوبة، واتحجزت في المستشفى لأنى مكنتش بتحرك، والجلطة خلتني حاسة كأنى طفلة وبيتهيألي حاجات كتير من كمية الأدوية اللى كنت باخدها، وبقيت أشوف حاجات غريبة وبقيت اتصرف تصرفات أطفال".
وقالت الفنانة ليلى غفران في نفس اللقاء: "كان نفسي أجيب عيال من غير جواز لأن كل زيجاتي غير موفقة، وعلشان أنا طيبة زيادة عن اللزوم مكنش فيه نجاح لزيجاتي".
تعرض ليلى غفران للخيانة
وتابعت: "خلال زيجاتي مكنتش بحب الغلط وكنت اتغاضى مرة واتنين ولكن بعد كده مبسكتش وتعرضت للخيانة من وريا وشوفت بعيني كمان، وفيه خيانة سامحت ولكن مقدرتش أستحمل من جوايا".
رفض ليلى غفران الزواج
وأكملت:"الجواز عاملي اكتفاء ذاتي ومش عايزة اعيش مع حد، وما زال فيه ناس بتتقدم ليا للجواز بس انا خلاص اكتفيت، وكان فيه حد متقدملي قريب بس انا عاجبني حالي لوحدي".
زيجات ليلى غفران
وأكدت ليلى غفران: "اتجوزت 5 مرات بس منهم جوازات باعتبرهم مش جوازات لإنها عدت مرور الكرام ومن كتر جوازاتي نسيت أسامي اللى اتجوزتهم، والست المغربية قادرة تتأقلم مع كل الظروف والأحوال سواء ربة منزل أو عاملة أو زوجة أو صديقة وناجحة في كل شيء".
يُعرض برنامج "كلام الناس فى رمضان" على قناة "MBC مصر" يوميا الساعة 12:00 منتصف الليل، وعرضت هذه الحلقة أمس الإثنين 18 أبريل 2022 الساعة 12:00 منتصف الليل.
