تفاصيل افتتاح السيسي مشروعات الكهرباء وتفقده لمحطة بنبان للطاقة الشمسية.. رسائل الرئيس الأبرز

تفقد الرئيس عبد الفتاح السيسي اليوم مجمع بنبان للطاقة الشمسية بمحافظة أسوان، كما افتتح عددًا من المشروعات التابعة لقطاع الكهرباء بمحافظات الصعيد وأبرزها:

- تحويل محطة غرب أسيوط من الدورة البسيطة للعمل بالدورة المركبة

- افتتاح مركز تحكم سمالوط الإقليمي

- افتتاح مركز تحكم نجع حمادي الإقليمي 

- افتتاح محطة محولات إسنا جهد 220 كف

- محطة محولات بنبان 3 للطاقة الشمسية

ووجه الرئيس السيسي الشكر إلى الدكتور محمد شاكر وزير الكهرباء، على جهوده في ملف الطاقة والكهرباء، قائلا: فرصة النهاردة اشكر الدكتور شاكر كزميل هنا لينا وعلى الجهد اللى عمله في مشكلة من أكبر المشاكل اللى قابلتنا في مصر. 
وأضاف الرئيس السيسي: مش كل مرة في الافتتاحات بنتكلم عن اللى اتعمل وبكام وكده.. إحنا النهاردة بنتكلم عن عالم جليل فاضل في التخصص.. ومن خلال جهده وعلمه يقدر يحقق نقلة في موضوع الكهرباء في مصر".

وأكد الرئيس السيسى، أن قطاع الكهرباء شهد ظروفا صعبة في الدولة المصرية قبل البدء في تطويره بشكل كامل. 

وقال الرئيس: قطاع الكهرباء في كل شيء كان صعب جدا وفي موضوع الطاقة.. وماشيين في الطاقة ومش اقصد على الكهرباء بس.. إحنا لما اتكملنا عاوزين مصر فيما يخص الطاقة الكهربائية سواء إنتاج أو توزيع أو تحكم زيها زى أي دولة متقدمة جدا في المجال". 

وأضاف الرئيس السيسى: نقدر نعمل ربط كهربائى مع دول الجوار نقدر.. ظروفنا في 2013 و2014 قبل كده مكنش هنقدر.. العالم رايح لكده.. الدولة اللى مش هتكون جاهزة هيفوتها الربط الكهربائى وده لمصلحة البشر والشعوب.. لازم يكون عندك ربط وتتبادل والاستفادة المتبادلة في الكهرباء.. والإجراءات والجهود في هذا المجال.. لازم يكون قطاع الطاقة أو الكهرباء من أرقى ما يمكن.. بوجه التحية والتقدير إلى الدكتور شاكر ووزارة الكهرباء. 
وقال الرئيس السيسي: دكتور شاكر له مكتب وشركة كبيرة.. "مكتب شاكر".. ساب الشركة دى ولم يسمح لها بالدخول مع الدولة والحكومة والقوات المسلحة.. ليه يا دكتور شاكر.. آى حاجة بيعملها بدون مقابل.. وانا حابب الحكاية دى".

وأوضح الرئيس السيسي إن الاستثمارات في الصعيد خلال الفترة الماضية تخطت تريليون و100 مليار جنيه

وأضاف الرئيس: الأرقام اللى اتحطت للصعيد فوق التريليون جنيه و100 مليار جنيه فى الكام سنة دول ولسه شغالين".
وأشار الرئيس السيسي إلى “أن عرض أسبوع الصعيد هدفه أن نقول للناس الاهتمام مش كلام.. حد من كام يوم بيقولى الرقم كام.. أديك رقم صغير وأسيبك كده لا كهرباء ولا مياه ولا صرف صحي ولا طرق ايه ده؟”.
وقال الرئيس: الإعلام مهم جدا إنه ياخد البيانات وإذا كان محتاج يبسطها بالتنسيق مع وزارة الكهرباء ميجراش حاجة علشان في النهاية الناس تجد الخدمة بالشكل المناسب".

وقال الرئيس السيسي، إن مشروع حياة كريمة في محافظات الصعيد يضم أكثر من 30 مركزا. 

وأضاف  : معرفشى اللى هقوله مناسب.. هل ممكن العدادات اللى هنعملهم في مراكز حياة كريمة.. الـ 34 مركزا تكون العدادات مسبوقة الدفع.. لما اعمل خليت المواطن شايف الاستهلاك.. فيه ناس اشتكت أن القراءة مش مضبوطة.. العداد معاك وانت اللى بتشحنه بدون قراءة.. انت تنظم استخدامك للكهرباء".
وأضاف الرئيس السيسي: لو نقدر نعمله ياريت عداداتنا في الدولة المصرية تكون مسبوقة الدفع.. علشان مشكلة الشكاوى من القراءات.. لو ده ممكن يبقى نعملها.. مش هطول أكثر من كده.. بشكرك يا دكتور شاكر.. ولسه إحنا فى أسبوع الصعيد وهنكمل بكرة".

وأكد الرئيس السيسي، أن الدولة المصرية تواصل العمل في تنفيذ العديد من المشروعات الكبرى في مختلف المجالات

وقال: أهالى الصعيد لازم تشوف حجم الجهد المبذول وده مش من الدولة.. ده شغلنا وبنعمله ولو مش عملنها يبقى مقصرين.. وهنعمل أكثر كده.. وإمبارح كنا في توشكى.. والزملاء اللى كانوا معانا أول مرة يدخلوا يشوفوا". 
وأضاف الرئيس السيسى: "خلوا الناس تشوف توشكى وشرق العوينات وغيرها.. لانه بيكون فيه تشكيك فيما تنفذه الدولة من مشروعات.. خليهم يبنوا الأمل.. كل مشروع من ده سد عالى على الأقل.. عاوز الناس تشوف علشان المعنويات ترتفع والثقة تزيد بأن الدولة قادرة تأخذ وتحسن وضعها وتبقى في مستويات أفضل.
وقال الرئيس أن المشكلة في 2014 "إن إحنا ننتج كهرباء بس.. لأ.. ننتج وننقل ونخلى جودة توزيعها عالية، علشان نعمل ده اتكلف تريليون و58 مليار جنيه بدون تكاليف مشروعات حياة كريمة..الرقم ده لما أتحط، كتير مننا قال هل كان فيه خيار تاني؟....لأ"، مشيرا إلى أن الخطة العاجلة للكهرباء تكلفت 2 مليار دولار".
وأضاف الرئيس السيسي "المحاضرة دي والتقديم بتاع الدكتور شاكر موجودة على موقع وزارة الكهرباء، وتفاصيل أكتر من كده، والبيانات دي مهم انها توصل للناس، سواء الورقي والتليفزيون والراديو نتكلم عن الموضوع ده علشان الناس تعرف الحكاية ماشية إزاي.
وقال الرئيس: "لما بتكلم مع الناس يقولوا الكهرباء غالية علينا، صحيح، هي غالية لكن مش عاوزين نغليها عليكم".. أحب كل واحد ياخد حقه، أنا وفرت لك خدمة،..حوكمة إجراءاتنا اللى احنا بنعمله نستهدف منه تحصيل ولا لأ؟ لو مش بنحصله هايبقى فيه عجز مش هتقدر الدولة تتحمله..دولة ذات شأن وننمى انفسنا وندي فرصة للقطاع الخاص والصناعة إنها تنمو وتستقر، ولو مفيش كهرباء المصانع هتقفل والعمالة هتبقى بره والبلد دي هتتهد".
وأكد الرئيس السيسي، أن المشروعات الجديدة التي يتم تنفيذها فى محافظات الصعيد يعمل فيها شباب الصعيد. 

وقال: "المحطة الجديدة بتاعت الطاقة الشمسية بيشغلها القطاع الخاص.. وأهل الصعيد أولى بالشغل فيها". 
وأضاف الرئيس السيسي: خلوا الناس تشوف المحطات.. الطيارة ماشية فوق المحطة 5 دقائق.. دى حاجة عظيمة.. نوفر فرصة لشباب الجامعات والمدارس لو أمكن يشوفوا الكلام ده.. والأمور في البلاد تتجه للأفضل". 
وقال الرئيس السيسي: يا دكتور شاكر بتقدم الشكر وزارة الدفاع وتدق معاهم في الفلوس".. ليرد عليه وزير الكهرباء قائلا: "تحت أمر سيادتك.. بس أنا عندى الفلوس حاجة والشغل حاجة تانية.. وتحت أمرك سيادتك".

وجاءت أبرز رسائل الرئيس:

- هناك دول عجزت عن حل مشكلات الكهرباء بها لكننا قررنا مواجهتها ونجحنا

- واجهنا مشكلات إنتاج ونقل الكهرباء في عامي 2013 و2014

- نستهدف وضع مصر في مصاف الدول المتقدمة فيما يتعلق بإنتاج الطاقة المتجددة.

- الكتلة الأكبر من مشروعات حياة كريمة ترتكز في محافظات الصعيد

- الأمن القومى كان ممكن يتأثر بمشكلة الكهرباء

- إحنا لسه في أسبوع الصعيد.. وفي افتتاحات جديدة بكرة

-  قطاع الكهرباء شهد ظروف صعبة قبل مرحلة التطوير

-  كل المشروعات الجديدة بيشتغل فيها شباب الصعيد

- مش عاوزين نغلي الكهرباء..احب كل واحد ياخد حقه

- وزير الكهرباء عالم جليل فاضل في التخصص