نتيجة تنسيق المرحلة الأولى تحتل تريند مصر وتثير سخرية النشطاء
احتلت نتيجة تنسيق المرحلة الأولى للثانوية العامة مركزًا متقدمًا في تريند مصر على "تويتر".
وشغلت نتيجة تنسيق المرحلة الأولى للثانوية العامة بال كثيرًا من المصريين، وخاصة بعد أن أظهرت النتيجة تدني مجاميع القبول في الجامعات المصرية عام 2021-2022، ليبلغ نسبة المجاميع للقبول في كلية الطب البشري 90.7%، وفي طب أسنان 90.2%، وفي الصيدلة 88.5%. وفي علاج طبيعي 88.5%، وفي الهندسة80%، في حين بلغت نسبة المجاميع للقبول في الألسن80.7%، والإعلام79.4%، وفي الاقتصاد والعلوم السياسية 83.9%، وفي الفنون الجميلة 67.8%، وفي الآثار78.2%.
وأثار نسب مجاميع القبول في الجامعات، التي أعلنت في تنسيق المرحلة الأولى للثانوية العامة 2021، حالة من الجدل والسخرية بين نشطاء مواقع التواصل الاجتماعي.
نتيجة تنسيق المرحلة الأولى
وقال محمد مجدي "طب المنصورة: تحياتي لتنسيق بورسعيد وعين شمس وباقي الكليات الكريمة، كنت أتمني أشارك معاكم في السحب #تنسيق_المرحله_الاولي #تنسيق_الجامعات_2021".
وعلقت ياسمين ياسر قائلة: "ايه الذكاء بتاع الناس في انهم زعلانين يا حرام كليتنا تنسيقها واقع هو ايه اللي تنسيقها واقع!! الكلية لها اماكن تتملي واعداد معينة علي هذا الأساس بتحدد الرقم واصلا معظم المجاميع في الـ ٧٠% ايه ده بجد اللي ميعرفش يقول عدس #تنسيق_المرحله_الاولي #تنسيق_الجامعات_2021".
وقال أحمد علي في تعليقه: "هما صعبوا الامتحانات.. هي امتى الدولة هتفهم ان احنا عندنا عجز رهيب في القطاع الطبي ولازم تهتم شوية بالكليات العملية والتمريض والتعليم الفني #تنسيق_المرحله_الاولي".
تنسيق المرحلة الاولى
أما نادين فقالت: " كله بيتكلم عن تنسيق طب وهندسة واعلام وألسن، محدش عارف تنسيق تربية وآداب من كام يا ولاد؟ #تنسيق_المرحله_الاولي".
وأضافت إيمان سلامة: "ايه المهزله اللي بتحصل في تنسيق الكليات دا بجد!! هيبه الكليات راحت عليه العوض".
ورد حسام الدين:"السنة بتاعتنا استثنائية كل الكليات كانت مستوعبة أكتر من حاجتها ودا كان منزل شوية تنسيق المنصورة".
وعلق عبد الرحمن قائلًا: "الطلبة فرحانة ان علاج كفر الشيخ بقت أعلى تنسيق وهيبقا ليها قيمة أكبر".
وردت المها:" تنسيق الصيدلة نزل جدا علشان شالوا التكليف. قيمة الكلية الحكومة هي من تحددها وسوق العمل. حيث خرج العلم عن مبتغاه وأصبح تجارة وأكل عيش مع أني أعتبر الصيدلة مهمة جدا مثل الطب البشري ويمكن أهم. لأن الدواء هو طريق العلاج".
وقالت ياسمين إمام: "بصراحة الله يعين بتوع الجامعات الخاصة دلوقتى زمانهم مش عارفين يعملوا تنسيق اصلا"
وسخر محمد البي قائلًا: " تنسيق يضحك".
تنسيق فوتوشوب
وردت إسراء " حاسة ان تنسيق الثانوية العامة دا فوتوشوب".
وسخرت ربا علاء قائلة: "بعد ما شوفت تنسيق ثانويه عامه النهارده وعرفت ان بمجموعي من سبع سنين كان ممكن اخش هندسه اللي كنت بتمناها حمدت ربنا اني مدخلتهاش ودخلت الالسن. ربنا دايما بيعملنا الخير الحمدلله".
وردت ريهام أشرف:" دا مش تنسيق 2021 دا تنسيق الثمانينات دا".
وقال أميرة عادل "طب الواحد لما يشوف تنسيق السنه دى يضحك ولا يعيط".
وعلق محمد رامي ساخرًا: "هاي تربيه الي انا داخلها ب مجموع ٣٨٢ نازله في تنسيق السنه دي من ٢٩٩ ".
